Претседателот на УФЦ, Дејна Вајт, ги објави деталите од состанокот што го имал со Хабиб Нурмагомедов. Вајт и борецот од Дагестан кој замина во пензија, се сретнале во петокот во Абу Даби.

Вајт открил дека не успеал да го убеди Нурмагомедов да се врати во октагонот, меѓутоа непоразениот во лесна категорија, рекол дека ќе размисли и ќе реши дали ќе се врати, по борбите што следат, а во кои ќе се соочат Конор Мекгрегор и Дастин Поирие, односно Ден Хукер и Мајкл Чендлер.

„Ќе ги гледа тие борби кои ќе се одржат наредниот викенд. Доколку направат нешто спектакуларно, тогаш можеби ќе се врати“, открил Вајт.

„Смета дека Чарлс Оливеира бил одличен против Тони Фергусон, а доколку момците наредниот викенд приредат спектакл, Хабиб би можел повторно да влезе во октагонот“.

Хабиб кариерата ја заврши без пораз, со 29 победи.

Челси, како гости, славеа минимална победа над градскиот ривал Фулам, во 19.коло во Премиер лигата. „Сините“, ставија крај на лошата серија, тие беа поразени на претходните три натпревари (Арсенал, Астон Вила, Манчестер сити).

Челси беа подобриот тим на теренот, но дури во финишот ја обезбедија победата. Во првиот дел Маунт го погоди дирекот, а Ареола го одбрани ударот на Ридигер. Во последната минута од првиот дел Фулам остана со играч помалку на теренот. Робинсон, поради жесток старт доби црвен картон.

Теренската надмоќ во вториот дел Челси ја реализираше во 78.минута, кога Маунт го постигна единствениот гол.



Одбојкарската репрезентација на Македонија обезбеди пласман на Европското првенство. Вечерва, во Скопје, Македонија ја совлада Турција со 3:1 (25:19, 21:25, 25:23, 25:18), со што втор пат во својата историја ќе учествува на континенталниот шампионат.

Македонските одбојкари убедливо го добија првиот и четвртиот сет, третиот во кој се водеше голема борба и припадна на Македонија, додека Турците го освоија вториот сет.

Најзаслужни за победата на Македонија беа капитенот Ѓорѓиев и Љафтов кои заедно освоија 47 поени (Ѓеорѓиев 24, Љафтов 23). На спротивната страна се истакнаа Субаши со 17, односно Лагумџија со 14 поени.

Европското првенство ќе се одржи во втората половина од годината, а домаќини ќе бидат Полска, Чешка, Естонија и Финска.

Фото/vfmkd.mk