Барселона нема да го добие Жоржињо Вајналдум од Ливерпул. Холанѓанецот, по завршувањето на сезоната ќе биде слободен играч, долго време се поврзува со трансфер во Барселона, меѓутоа неговиот менаџер им го понудил на Баерн Минхен.

Јасно е дека Барселона, за да ги исполни финансиските барања на Вајналдум, ќе мора да се натпреварува со клубови кои немаат финансиски проблеми.

Гостувајќи во подкастот на Спорт1, менаџерот Хемфри Нијман, рекол дека неговиот клиент нема да остане во Ливерпул и во исто време испратил порака во Минхен.

„Вајналдум наскоро ќе биде слободен играч што ги остава отворени опции за неговата кариера. Баерн е одличен клуб, ако се заинтересирани треба да разговараат со нас“, порачал Нијман.

Несогласувањата помеѓу некогашните соиграчи од Манчестер јунајтед, Ромелу Лукаку и Златан Ибрахимовиќ, речиси секојдневно се тема во италијанските медиуми.

Пред два месеци, во текот на градското дерби, малку фалеше Лукаку и Ибрахимовиќ физички да се пресеметаат. Потоа се препукуваа преку социјалните мрежи.

„Губевме 1:0, јас бев лут бидејќи промашив добра шанса. Неговите зборови ме погодија. Не се гордеам со мојата реакција, но не дозволувам никој да ме навредува. Скромен сум, победник и до смрт ќе се борам за своите соиграчи“, рекол Лукаку.

Потоа, Белгиецот открил што навистина мисли за Ибрахимовиќ.

„Тој е одличен фудбалер, победувал секаде каде што играл, постигнал повеќе од 500 голови. Имавме добра однос додека бевме во Манчестер јунајтед. Мислам дека играчи како него му се потребни на италијанскиот фудбал. Тој сака да победи за себе, јас за Интер, Роналдо за Јувентус. Сега е тука и Мурињо. Тоа се добри работи за италијанскиот фудбал“, заклучил Белгиецот.

Менаџерот на Манчестер јунајтед, Оле Гунар Солскјер, не задоволен од начинот на кој Премиер лигата го реши проблемот со одложениот натпревар против Ливерпул. Солскјер не е задоволен од терминот во кој е закажан натпреварот.

Манчестер јунајтед ќе го пречека Ливерпул на 13.мај. Ова значи дека пред финалето во Лига Европа, фудбалерите на Манчестер јунајтед ќе одиграат пет натпревари во две недели.

Манчестер јунајтед, во недела на 9.мај ќе гостува кај Астон Вила, два дена подоцна ќе го пречека Лестер, на 13.мај им е закажан натпреварот со Ливерпул, на 18.мај на „Олд Трафорд“ ќе пристигне Фулам, а во последното коло на 23.мај „црвените ѓаволи“ ќе гостуваат кај Вулверхемптон.

„Ова е скандалозно. Распоредот го прават луѓе кои никогаш не играле фудбал на врвно ниво. За играчите физички ова е невозможно. Сите ќе ни бидат потребни за тие натпревари, мораме да бидеме подготвени“, рекол Солскјер за „БТ спорт“.