Вулверхемптон ја забележаа третата победа во последните четири премиерлигашки мечеви, откако дома со 2:0 рутински ги минаа Кристал палас, за да се искачат на третото место на табелата.

Исходот на мечот беше решен во првото полувреме. Рајан Аит Нури во 17. минута се најде на вистинското место за 1:0, пред да проработи португалската врска кај „волците“, Нето му асистираше на Даниел Поденсе во 27. минута за удвојување на водството.

Вулверхемптон сега се трети со 13 поени, исто колку што имаат и лидерите Евертон и Ливерпул (со натпревар помалку), додека Палас се на 9. место со 10 поени.



Анадолу Ефес, по подолго време во својот состав со Шејн Ларкин, стигнаа до 84:79 победа на гостувањето кај Олимпијакос за само втор триумф во шестото коло во Евролигата.

Ефес имаше +6 предност на полувреме, која ја заддржаа до крајот на мечот за победа. Ларкин постигна 11 поени од своите 15 во последната четвртина, а имаше и одлична помош од Василие Мициќ, кој додаде 20 поени. Хасан Мартин со 11 поени беше најефикасен за Олимпијакос, а Слукас и Меккисик додадоа по 10 поени.

Своја прва победа во новата сезона оствари рускиот Химки, откако со 83:77 беше подобар од тимот на Црвена звезда. Српскиот шампион пружаше одличен отпор и водеше со 63:58 пред последната четвртина, кога се случи пад на концентрацијата во тимот на Саша Обрадовиќ. Ерик Меккалам имаше 23 поени, Алексеј Швед додаде 15 поени и 12 асистенции, додека за Звезда, Џордан Лојд имаше 18, а Џони О’Брајант додаде 14.

ЕВРОЛИГА, 6.КОЛО

Химки – Црвена звезда 83:77 (19:22, 25:18, 14:17, 25:20)

Олимпијакос – Анадолу Ефес 79:84 (26:29, 12:15, 19:19, 22:21)

Басконија – Барселона 71:72 (19:20, 18:19, 19:19, 15:14)

Милано – Алба Берлин, одложено



Шалке ќе почека да ја оствари својата прва победа во новата сезона, откако нивната неверојатна лузерска серија продолжи против Штутгарт со 1:1 ремито, и сега славниот клуб од Гелзенкирхен има дури 22 бундеслигашки меча без триумф.

„Кралските сини“ во тој период сменија и тренер, но ниту Мануел Баум не успеа да ја „сврти“ работата – сега Шалке имаат две ремија во шест кола оваа сезона.

А, работите тргнаа добро за Шалке – Малик Тиав во 30. минута ги донесе во водство, нивно прво оваа сезона, по еден слободен удар за домаќините. Штутгарт успеа да израмни во 56. минута преку Николас Иван Гонзалез со гол од пенал.

Штутгарт сега се четврти со 9 поени, додека Шалке се на претпоследното место со два поени и само Мајнц се зад нив (со пет порази во пет меча).