На денот кога лошото време го преполови распоредот на НБА и одложи три натпревари, највозбудлив беше мечот меѓу Минесота Тимбервулвс и Мемфис Гризлис, во кој гостите победија со 127:125 благодарение на неверојатниот Џа Морант.

Натпреварот во Минеаполис беше неизвесен од почетокот до последната секунда, тимовите 25 пати се менуваа во водствот.

Џа Морант имаше скромна вечер и заврши со само 12 поени, а до последната минута погоди само три од 17 шута, но во финишот одигра спектакуларно.

Прво израмни на 125:125 на 54 секунди до крајот, а во последниот напад на Гризлис погоди од слична ситуација на 18 секунди до крајот. Ентони Едвардс имаше две прилики за три поени да им донесе победа на Вулвс, но не успеа да погоди.

Џарен Џексон Јуниор ги предводеше Гризлис со 33 поени и осум скока и Дезмонд Бејн со 21 поен. Покрај Џексон и Бејн уште петмина играчи на Мемфис постигнаа двоцифрен број на поени.

На спротивната страна Ентони Едвардс имаше подеднакво лош ден како и Морант со само 15 поени и 4/13 шут. Најдобриот меч во Минесота, по трејдот со Њујорк, го одигра Донте Дивиченцо (27 поени, 10 скока и седум асистенции).

Со оваа победа Гризлис се зацврстија на третото место на Западот со скор 25-14, додека Минесота, откако ја прекина серијата од три победи, падна на 20-18 на осмото место на Западот.

Синоќа се одиграа само четири од седумте предвидени натпревари бидејќи во Лос Анџелес беа одложени натпреварите Лејкерс-Сан Антонио и Клиперс-Шарлот поради катастрофалените пожари, а натпреварот Атланта Хокс-Хјустон Рокетс беше одложен поради мразот во Атланта.

Првиот ден на Австралија опен не започна според желбите на организаторите, бидејќи по само еден час игра започна да врвне дожд.

Невремето пропратено со грмежи никого не остави рамнодушен.

Сите мечеви беа веднаш прекинати, а само оние кои се играа на трите најголеми стадиони: Род Лејвер Арена, Маргарет Корт Арена и Џон Кејн Арена се играат според распоредот.

Во недела, првиот ден на АО, врнежи се прогнозираат во текот на целиот ден, па останува да се види како ќе се развива ситуацијата, но има одредени шанси повеќе да не се играат натпревари освен на споменатите терени кои имаат покрив до крајот на денот.

Една од главните теми по убедливата победа на Манчестер сити против Салфорд во третото коло од ФА Купот беше Кајл Вокер.

Сити славеше со 8-0, а Вокер не беше во протоколот за натпреварот.

„Во неговиот ум, тој е подготвен да ја истражи можноста да замине во друга земја, да ги одигра последните години на друго место. Постојат неколку причини за тоа. Пред два дена ни кажа дека сака да ја заврши кариерата на друго место“, потврди Гвардиола дека Кајл Вокер го известил клубот дека сака да си замине.

„И затоа преферирам да имам играчи на теренот кои целосно се тука“.

Вокер со Сити освои 17 трофеи – од нив шест титули во Премиер лигата и една во Лигата на шампионите. Тој во клубот пристигна од Тотенхем во 2017 година за 50 милиони фунти.

Многу се зборуваше дека ќе замине во Баерн во летото 2023 година, но потоа го продолжи договорот со Сити до 2026 година.

„Не можевме ни да ги замислиме сите успеси што ги постигнавме без Кајл. Беше фантастичен. Но, тој рече дека сака да си замине“, заклучи Гвардиола.

Според медиумите, 34-годишниот десен бек кариерата ќе ја продолжи во Милан.