Жан Тод, поранешниот шеф на Ферари, еден од ретките луѓе што може да го посетат Михаел Шумахер, даде интервју за германските медиуми. Тој уште еднаш потврди дека двапати месечно оди во посета кај легендарниот возач.

Седумкратниот Формула 1-шампион, Михаел Шумахер, сè уште е во тешка состојба, но еден од неговите најблиски соработници тврди дека е во најдобри раце. За време на новото интервју за германските медиуми, поранешниот директор на Ферари, Жан Тод, истакна дека поранешниот возач е опкружен со луѓе што го сакаат.

За потсетување, Шумахер на 29 декември 2013 година имаше тешка несреќа на скијање, девет месеци мина во болница во Франција, а потоа е префрлен на домашно лекување.

Оттогаш, неговата сопруга Корина, која стана глава на семејството, ги чува во тајност деталите за неговото здравје, а само повремено излегуваат детали за вистинската состојба на Михаел.

Кругот на луѓе што имаат пристап до Шумахер е многу мал, а Жан Тод двапати месечно оди да го посети легендарниот возач. Заедно повремено ги следат трките во Формула 1, каде што денес се натпреварува Мик Шумахер.

„Среќен сум што навивачите, не само во Германија, мислат толку многу за него. Луѓето прашуваат многу за Михаел. Навивачите треба да знаат дека тој е во најдобри раце, опкружен со луѓе што го сакаат“, рече Тод.

За разлика од поранешниот директор на Ферари и еден од најблиските соработници на Шумахер за време на неговата тркачка кариера, други луѓе немаат пристап до домот на Шумахер.

Неодамна за тоа проговори Еди Џордан, поранешниот сопственик на тим во Формула 1.

„Корина во еден момент беше во врска со мојот возач Хајнц-Харалд Френцен. Таа го остави и подоцна се омажи за Михаел. Бидејќи ја познавам, ѝ се јавив и ја прашав дали можам да дојдам да го видам Шумахер. Одоговорот беше – не. Таа ми рече дека никој не може да го види, освен најблиските членови на семејството“, изјави пред неколку дена легендарниот ирски возач Еди Џордан.