Лионел Меси во 74. минута од мечот го постигна единствениот гол за Барселона, конечно, да го скрши отпорот на Гранада и да победи со 1:0 во првиот меч под водство на новиот тренер, Кике Сетиен.

Иако фудбалот можеби беше поубав за око во првото полувреме, Барса доминацијата не успеа да ја претвори во гол – тие имаа 82 отсто од поседот на топката во првите 45 минути и осум удари на гол.

Во 69. минута гостите останаа со играч помалку по црвениот картон на Херман Санчез и само 10 минути подоцна во убава претстава на „тики-така“ фудбал, Меси, Гризман и Видал направија шанса, која потоа лесно ја реализираше Лео Меси.

Со победата, Каталонците се вратија на првото место во Ла лига со 43 поени, колку што има и второпласираниот Реал Мадрид со послаба гол-разлика. Гранада по одличниот старт на шампионатот, сега се 10. со 27 поени.

Кристијано Роналдо ја почна 2020 со стил, откако ги постигна двата гола за Јувентус за 2:1 победата над Парма за три поени со кои се одвоија на +4 пред Интер на табелата во Серија А.

Откако ја почна годината со хет-трик против Каљари (4:0 победа), Роналдо стрелаше против Рома (1:2 победа) и сега против Парма за да собере шест гола само во јануари или 11 гола во последните седум меча од Серија А, иако за неколку години ќе го прослави својот 35. роденден.

Португалецот го отвори резултатот во 44. минута од мечот, кога неговиот удар беше пренасочен од одбранбените играчи на гостите за 1:0. Сепак, гостите успеаја во 55. минута да израмнат преку Корнелиус со убав гол со глава, по што на сцената повторно стапи Роналдо само три минути подоцна кога убавата топка на Дибала ја смести во голот на гостите.

На амбициите на Пари Сен-Жермен очигледно им нема крај. Според француските медиуми, катарските сопственици на клубот, „Катар спортс инвестментс“, подготвуваат понуда која Пеп Гвардиола нема да може да ја одбие и покрај неговите тврдења дека е задоволен во Манчестер сити.

Според британскиот „Експрес“, оваа понуда може да значи Каталонецот да си замине на крајот на оваа сезона, која сигурно ќе биде неговата најнеуспешна во англискиот фудбал. Семејството на Гвардиола се врати во Барселона минатото лето, најмногу поради бизнисот со мода на неговата сопруга, но Пеп неодамна изјави дека нема намера да си оди од Манчестер.

„Не се работи само за тоа дали сме победиле во последните два меча. Дури и да биде лошо, не одам никаде. Ниту еден менаџер не победува постојано, а јас уживам во работата со овие фудбалери“, изјави Гвардиола.

Трансферот може да има и политичка позадина. Сопственици на сити се кралското семејство на Абу Даби, инаку дел од Обединетите Арапски Емирати (ОАЕ), кои не се во најдобри односи со Катар (дури ги имат и прекинато дипломатските односи).

Сегашниот тренер на ПСЖ, Германецот Томас Тухел има над 75 отсто успешност во неговите мечеви, но не е тајна дека газдите ќе бидат задоволни само со освојувањето на Лигата на шампионите, каде што и лани тие потфрлија. ПСЖ игра со поранешниот тим на Тухел, Борусија Дортмунд во осминафиналето во февруари.

PSG 'ready to make Pep Guardiola massive offer to leave Man City' if they sack Thomas Tuchel https://t.co/3lg1Xt4FNn

— Sun Sport (@SunSport) January 19, 2020