Администрацијата на Бајден темелно ќе ги разгледа санкциите на САД врз претставници на Меѓународниот кривичен суд воведени во врска со истрагите за американските сили во Авганистан, изјави во вторникот портпарол на Стејт департментот, пренесува „Ројтерс“.

„Колку и да не се согласуваме со постапките на кривичниот суд во врска со ситуациите во Авганистан и во Израел/Палестина, санкциите ќе бидат темелно разгледани додека ги утврдиме нашите следни чекори“, рече портпаролот.

Администрацијата на Трамп минатата година го обвини Хашкиот трибунал за кршење на националниот суверенитет на САД кога одобри истрага за воени злосторства извршени од авганистански сили, талибанци или американски трупи.

Санкциите беа насочени кон судскиот персонал, вклучувајќи ја и обвинителката Фату Бенсуда, со замрзнување на имотот и забрани за патување поради истрагата на американски граѓани без согласност на САД. САД не се член на судот.

Американскиот државен секретар на Трамп, Мајк Помпео, исто така се спротивстави на истрагата започната во 2019 година за наводни воени злосторства на палестинските територии, вклучително и од израелските сили.

„Новата американска администрација ги поддржува реформите за да му помогне на судот подобро да ја постигне својата основна мисија за казнување и спречување на злосторствата и може да соработува со МКС во исклучителни случаи“, додаде портпаролот на Стејт департментот.