Два туристички авиони со осум патници и членови на екипаж се судрија над езеро во американската сојузна држава Ајдахо и потоа потонале на дното од езерото. Според информациите, несреќата најверојатно никој не ја преживеал.

Три тела се извлечени од езерото, а за останатите се уште се трага.

„Првите информации говорат дека се работи за осум патници и членови на екипаж. Проценуваме дека нема преживеани“ се наведува во изјавата на шерифот на округот Кутенај.

Остатоците од авионите потонале на длабочина од 40 метри, каде се лоцирани со помош на сонар.

Што довело до судир на авионите засега не е познато, а тоа ќе го утврди истрагата.

Медиумите пренесуваат дека меѓу патниците имало и три деца.

Вториот по големина австралиски град, Мелбурн, ќе биде ставен под карантин поради коронавирусот, пренесе агенцијата АФП.

Засега нема повеќе информации за тоа дали карантинот во Мелбурн ќе биде целосен или се работи за дополнителна контрола на влез и излез од градот.

Австралија вчера ја изолира државата Викторија од останатиот дел од земјата и воведе мерки без преседан како дел од борбата против зголемувањето на бројот на новозаразени од коронавирус.

Најавената мерка за изолација, која би требало да биде во сила до 29 јули, ќе погоди над 300.000 од пет милиони жители на овој град.

Австралија досега успеа да го сузбие ширењето на коронавирусот многу подобро од голем дел од другите земји. Досега забележа вкупно 8.500 случаи на зараза и 105 смртни случаи.

Ако е точно дека коронавирусот се пренесува преку воздухот, тоа значително ќе влијае на мерките за нејзина контрола, пишува „Њујорк Тајмс“.

Весникот наведува дека новите мерки би значеле носење маски во затворено, дури и ако се почитуваат мерките за физичко растојание.

„Њујорк Тајмс“ вчера објави дека група од 239 научници од 39 земји, оваа недела ќе објават отворено писмо до Светската здравствена организација во научно списание, така што агенцијата на ООН може да ги ревидира препораките за тоа како да се избегне корона инфекција со вирусот.

Научниците тврдат дека коронавирусот се пренесува преку воздухот, што значи дека честичките од тој вирус можат да лебдат во воздухот во затворен простор и дека луѓето можат да се заразат кога ќе ги вдишат.

Позицијата на СЗО е дека вирусот се шири првенствено од личност до личност преку мали капки од носот или устата, кои се исфрлаат кога некое лице со ковид-19 кашла, кива или зборува.

Доколку вирусот се пренесува преку воздухот, според „Њујорк Тајмс“, последиците за неговата контрола ќе бидат значителни.

Како што е објаснето, новите превентивни мерки вклучуваат носење маски во затворен простор, дури и ако се почитуваат мерки за социјално дистанцирање и задолжителни маски – Н96 за здравствените работници кои се грижат за заразени пациенти „да ги филтрираат дури и најмалите капки за дишење“.

Покрај тоа, според „Њујорк Тајмс“, системите за вентилација би требало да се менуваат за да се намали циркулацијата на воздухот.

Весникот исто така наведува дека, по разгледувањето на внатрешните електронски пораки на СЗО и интервјуата со 20 научници, вклучително и консултантите на СЗО, се добива слика на агенцијата како некој кој „и покрај добрите намери, не се придржува до науката“.

„Њујорк Тајмс“ наведува дека неодамнешното зголемување на бројот на жртви на коронавирус, по повторното отворање на компании и канцеларии, „сè повеќе го потврдува она што многу научници го велат со месеци: Вирусот останува во воздухот во затворено, заразувајќи ги оние што се во близина“.