Европа
Активисти на „Гринпис“ во обид да го блокираат бродскиот превоз

Активисти на „Гринпис“ денеска се обидоа да го блокираат бродскиот превоз до рафинеријата „Шел“ на пристаништето во Ротердам, како дел од кампањата против, како што велат, „зеленото перење“, односно лажното рекламирање на нафтената индустрија, која сака да се профилира како дел од оние индустрии што се грижат за околината.
Во акцијата во Ротердам, пловилото „Белуга“, долго 33 метри, се закотви на влезот во делот на пристаништето кој е резервиран за „Шел“, каде што се наоѓа големата рафинерија „Пернис“, пренесува „Ројтерс“.
Портпаролот на рафинеријата, Марк Потма, рече дека компанијата го поддржува правото на групите да демонстрираат, под услов тоа да се направи на безбеден начин што, според него, не било така во денешниот случај.
„Демонстрантите се нелегално на нашиот имот, каде важат строги безбедносни прописи“, рече тој.
Портпаролот на пристаништето во Ротердам рече дека едвај имало сообраќаен метеж, но дека некои пристапи се блокирани.
„Поради акцијата два брода не можат да се натоварат или растоварат“, нагласи тој.
Како што пренесува „Ројтерс“, акцијата се случува во моменти кога активистите на „Гринпис“ и повеќе од 20 други еколошки групи започнале кампања против рекламирање низ Европа во врска со спонзорствата на бродските компании за нафта и гас, споредувајќи ги со штетната промоција на тутунот.
Групите порачаа дека ќе започнат протести и ќе соберат милион потписи од граѓани на Европската Унија за да го изложат законот за забрана за рекламирање фосилни горива пред Европската Комисија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Чавушоглу: Парламентот на Турција не може да го ратификува барањето на Шведска и Финска за членство во НАТО

Парламентот на Турција не може во сегашните услови да го ратификува протоколот за членство на Шведска и Финска во НАТО, тоа е невозможно, изјави шефот на турската дипломатија, Мевлут Чавушоглу.
„На гости ни дојде министерот за надворешни работи на шведската влада. Беше во парламентот, се сретна со партиски претставници. Слушна дека сите партии го најавуваат истото, дека без исполнување на обврските кон нас не е можна ратификација. Затоа, во сегашните услови, нема потреба да се зборува за одобрување на тој документ“, рече Чавушоглу на заедничката прес-конференција со својот унгарски колега Петер Сијарто.
Шефот на турската дипломатија нагласи дека „ако Шведска ги исполни своите обврски“, Анкара може да седне и да преговара со Стокхолм.
„Во овој момент, сепак, не можеме да го поддржиме членството на Шведска во НАТО“, рече турскиот министер.
Чавушоглу, сепак, посочи дека Анкара би можела позитивно да го разгледа членството на Финска во НАТО доколку Хелсинки и Северноатлантскиот сојуз одлучат Финска да поднесе барање за членство одделно од Шведска.
Според неговите зборови, Турција во моментот ја гледа кандидатурата на Финска за членство во НАТО во попозитивно светло од кандидатурата на Шведска.
По почетокот на руската специјална воена операција во Украина, на 18 мај минатата година, Финска и Шведска поднесоа барања за влез во алијансата до генералниот секретар на НАТО.
Барањата на Шведска и Финска не ги ратификуваа само две од 30-те земји – Унгарија и Турција, пренесе „Новости.рс“.
Европа
Борис Џонсон: Путин го отвори патот за членство на Украина во НАТО

Со децении користевме дипломатска реторика со две сечила на тема НАТО и Украина и тоа резултира со целосна катастрофа, пишува поранешниот британски премиер, Борис Џонсон, во авторски текст за „Вашингтон пост“.
„Поминавме години кажувајќи им на Украинците дека имаме политика на отворени врати во НАТО и дека тие имаат право сами да си ја изберат судбината и дека Русија не треба да може да наметне вето.
И сето ова време отворено ѝ сигнализиравме на Москва дека Украина никогаш нема да се приклучи на алијансата – затоа што многу членки на НАТО, едноставно, самите ќе стават вето.
Во принцип – да, во пракса – не. Тоа беше пораката.
И каков е резултатот од сето тоа? Што постигнавме со тивко говорење на двете страни?
Резултатот е најлошата војна во Европа во последните 80 години“, според Џонсон.
„Рускиот претседател Владимир Путин уништи безброј животи, домови, надежи и соништа. Ја уништи и најмалата причина да има некаква симпатија кон него или неговата параноја. Попатно, тој направи да исчезне случајот против членството на Украина во НАТО. Украинското население се сметаше за премногу поделено во врска со членството во НАТО; а пред 2014 година секако можеше да се бара.
Ако ги видиме бројките сега, поддршката за членство во НАТО во Украина отиде во стратосферата – таа е 83 проценти според резултатите од неодамнешната анкета. Беше кажано дека Украина не е соодветно воено компатибилна со НАТО. Денес, Украинците користат вртоглаво количество разновидна опрема од земјите на НАТО, со најголема вештина и храброст. Нема апсолутно ништо што НАТО би можел да ги научи Украинците за водење војна – всушност, има многу што тие би можеле да нè научат“, според Џонсон.
„Пред сè, се тврди дека евентуалното членство на Украина во НАТО е провокативно за Путин и Русија. Вистината е дека никогаш не требаше да го прифатиме овој аргумент. Требаше да инсистираме на реалноста – дека Кремљ нема од што да се плаши кога е НАТО во прашање бидејќи е одбранбен сојуз. Но, земјите членки го прифатија ова лажно гледиште. Признавам дека извесно време и самиот го прифаќав“, пишува Џонсон.
Европа
Пожар во шведска нафтена рафинерија, има повредени

Пожарот што избувна во нафтената рафинерија „Нинас“ во шведската општина Нинашамн е изгаснат, а има луѓе со полесни повреди, соопшти полицијата.
„Спасувачките служби бргу пристигнаа на местото и пожарот сега е изгаснат. Погодената област веднаш е евакуирана“, соопшти портпаролот на компанијата „Нинас“.
Претходно од таму изјавија дека гори сурова нафта, но дека зградите не горат и дека нема опасност од ширење на пламенот. Неколку лица добиле полесни повреди, соопшти полицијата.