Авионот со пет Американци ослободени од Иран слета денеска во Соединетите Американски Држави еден ден по организираната размена за нивно ослободување, пренесува „Ројтерс“.

Веста дека авионот слетал првично ја објави Си-ен-ен, но во извештајот не се наведени дополнителни детали.

Размената е резултат на повеќемесечни преговори со посредство на Катар. Откога иранските средства блокирани во Јужна Кореја беа одмрзнати, тие беа префрлени во банките во Доха. Кога беше потврден трансферот, петте американски затвореници и двајца нивни роднини полетаа со катарски авион од Техеран во исто време кога двајца од петте ирански затвореници слетаа во Доха.

Тројца Иранци решија да не одат во Иран.

Според „Ројтерс“, овој договор отстранува една точка на несогласување меѓу САД, кои го сметаат Техеран за „спонзор на тероризмот“, и Иран, кој Вашингтон го нарекува „големата сатана“.

Американскиот претседател Џо Бајден го поздрави враќањето на затворениците, но неговата администрација најави и нови санкции.

„Ќе продолжиме да му наметнуваме трошоци на Иран за нивните провокативни дејства во регионот“, рече тој.

Иранскиот претседател Ебрахим Раиси, кој беше во Њујорк на годишното Генерално собрание на ОН, замената ја нарече хуманитарна акција.

„Тоа секако може да биде чекор врз основа на кој во иднина може да се преземат други хуманитарни акции“, додаде тој.