Свет
Американците извршија воздушен напад врз градот Сана и аеродром во Јемен

Делови од Јемен денеска беа нападнати од воздух, вклучително и главниот град Сана и аеродромот во Худаида, според ТВ Ал Масира, главната телевизија на движењето Хути што го контролира поголемиот дел од Јемен.
Цел на воздушните напади биле и јужниот дел на градот Замар, јавува телевизискиот канал. Телевизијата Ал Масира објави дека американските и британските сили ги извршиле нападите, но извор од британската влада изјави дека Велика Британија не е вклучена.
Американски официјални лица изјавија за Асошиетед прес дека американската војска нападнала голем број цели на Хутите во Јемен. Мета беа системи за оружје, бази и друга опрема што им припаѓа на бунтовниците поддржани од Иран, рече претставникот.
Сè уште не е достапен точниот број на цели бидејќи мисијата сè уште завршува, но медиумите на Хутите сугерираат дека седум напади го погодиле аеродромот во Ходеида, како и областа Катеиба, која е дом на воена база под контрола на Хутите.
Хутите, проиранска милитантна група, почнаа да напаѓаат меѓународни бродови минатиот ноември во знак на солидарност со Палестинците во Газа.
Нападите на Хутите ги поттикнаа американските и британските одмазднички напади, но и ја попречија глобалната трговија, бидејќи сопствениците сега ги пренасочуваат бродовите подалеку од Црвеното Море и Суецкиот канал.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
„Фајненшл тајмс“: Зеленски можно е оваа недела да го посети Трамп

Американскиот претседател Доналд Трамп може да го прими украинскиот претседател Володимир Зеленски оваа недела, објави новинарот на „Фајненшл тајмс“, Кристофер Милер, повикувајќи се на три извори.
Според Милер, средбата би можела да се одржи во петок, на 17 октомври, но други детали засега не се познати.
Двајцата лидери последен пат се сретнаа во септември за време на Генералното собрание на ОН во Њујорк, а во последните денови имале два телефонски разговора, меѓу другото и за можната испорака на американски крстосувачки ракети „Томахок“ на Украина.
Паралелно, украинската делегација предводена од премиерката Јулија Свириденко започнува недела на преговори со американските претставници во Вашингтон.
Свет
Скандал во Индија: Талибански министер не ги повикал новинарките на прес-конференција

Талибанскиот министер за надворешни работи на Авганистан, Амир Кан Мутаки, предизвика бурни реакции во Индија откако на својата прва прес-конференција во Делхи не ги повикал жените новинарки.
Настанот, на кој присуствувале околу 16 новинари, но ниту една жена, предизвика остри реакции од индиските медиумски организации и опозициски политичари. Тие го оценија инцидентот како „отворена родова дискриминација“.
Под притисок на јавноста, Мутаки следниот ден одржа нова, „инклузивна“ прес-конференција, каде изјави дека исклучувањето на жените било „техничка грешка“.
„Настанот беше организиран во краток рок и поканите беа испратени на ограничен список новинари, без никаква друга намера“, рече тој.
Мутаки моментално престојува во Индија на разговори со претставници од Русија и индиската влада, со цел јакнење на дипломатските врски.
Иако се обиде да ги оправда ограничувањата на жените во Авганистан, индиските новинари остро го прашаа зошто девојчињата таму веќе четири години немаат пристап до образование.
Свет
Лавров ги демантира гласините за труење на Башар ал-Асад

Рускиот министер за надворешни работи, Сергеј Лавров, ги отфрли наводите дека Москва наводно се обидела да го отруе поранешниот сириски претседател Башар ал-Асад, кој доби политички азил во Русија.
Како што објави руското издание Info24, Лавров на средба со претставници на арапските медиуми изјавил дека поранешниот сириски лидер и неговото семејство се наоѓаат во Москва „исклучиво од хуманитарни причини“.
„Тие беа изложени на закани со физичко насилство, па руските власти им овозможија азил. Асад нема никакви здравствени проблеми во нашата престолнина. Труење не се случило, а сите што ги шират тие гласини – нека останат со својата совест,“ изјавил Лавров.
Башар ал-Асад беше претседател на Сирија од 2000 година, а земјата ја напушти откако минатиот декември сириските бунтовнички сили влегоа во главниот град Дамаск.