Околу 300 припадници на Националната гарда на Калифорнија се распоредени на три различни локации во поширокото подрачје на Лос Анџелес поради протестите што траат веќе два дена, поврзани со спроведувањето на имиграциската политика.

Висок претставник од Лос Анџелес за CBS изјави дека припадниците на Националната гарда се распоредени околу федералните згради во центарот на градот и во населбата Вествуд.

„Денеска ќе има неколку протести во Лос Анџелес. Градот и полицијата внимателно ги следат“, рече претставникот.

Тој додаде дека полицијата во Лос Анџелес уапсила 29 лица, речиси сите поради одбивање да се разидат – што според законите се смета за прекршок.

Истовремено, нагласи дека градските власти „ги поддржуваат правата на имигрантите“ и ја опиша ситуацијата како „замаглена и без позитивен исход“ за полицијата.

Во објава на социјалните мрежи, заменик-директорот на ФБИ, Дан Бонџино, информираше дека уапсените се соочуваат со федерални, локални и државни обвиненија.

„Операциите против нелегалната миграција ќе продолжат, а секој што ќе се обиде насилно да ги попречи или спречи тие акции ќе биде предмет на истрага и кривичен прогон. Веќе се уапсени повеќе лица во Лос Анџелес и Њујорк, а дополнителни истраги се во тек и веќе даваат резултати. Многу од уапсените ќе се соочат со федерални обвиненија, покрај локалните и државните. Ако изберете насилство, тоа нема добро да заврши по вас. Избирајте паметно“, порача Бонџино.

We are not stopping or slowing down.
We are not intimidated or apprehensive.
Illegal immigration operations will continue, and anyone using violence to obstruct or impede these operations will be investigated and prosecuted.

Multiple arrests have already been made, in both LA…

— Dan Bongino (@FBIDDBongino) June 8, 2025

Том Хоман, комесарот за граница, за NBC News изјави дека локалните функционери во Калифорнија, вклучувајќи го гувернерот на Калифорнија и градоначалничката на Лос Анџелес, можат да бидат уапсени доколку продолжат да го попречуваат спроведувањето на федералната операција во областа на Лос Анџелес.

Хоман ги обвини гувернерот Гавин Њусом и градоначалничката Карен Бас дека „создаваат засолниште за криминалци“ и додаде дека никој од нив не е изземен од можноста за уапсување.

Според неговите зборови, службениците на американската имиграциска и царинска служба (ICE) во последните два дена уапсиле околу 150 илегални мигранти.

Ова следува по низа имиграциски акции спроведени во петокот, по кои избувнаа насилни демонстрации.

Претседателот Доналд Трамп одлучи да ја испрати Националната гарда во Лос Анџелес со цел, да се стави крај на „бездржавноста што се толерира со години“.

Аеродромот „Фрањо Туѓман“ во Загреб денеска попладне беше затворен за сообраќај поради инцидент со приватен авион кој се излизгал од пистата, пишува Индекс.

Инцидентот се случил околу 15:21 часот, при слетување на приватен авион од типот Cessna 525.

Леталото проклизнало и завршило на тревната површина покрај пистата.

Според информации од авиокомпанијата, авионот бил празен и во инцидентот нема повредени.

Во моментот се преземаат мерки за отстранување на леталото од пистата, а аеродромот останува затворен до понатамошно известување.

Од Аеродромот „Фрањо Туѓман“ се извинија на патниците за доцнењата на пристигнувачките и поаѓачките летови и најавија дека јавноста ќе биде навремено информирана кога сообраќајот повторно ќе биде воспоставен.

Повеќе од десетици илјади луѓе се собраа денес во Мадрид на демонстрации организирани од главната конзервативна опозициска партија, против владата на социјалистичкиот премиер Педро Санчез, обвинувајќи ја за корупција.

Демонстрантите се собраа на Шпанскиот плоштад во центарот на главниот град, велејќи му на Санчез да „поднесе оставка“.

Народната партија го свика собирот откако протечените аудио снимки наводно покажуваат дека член на Социјалистичката партија води кампања за клевета против полициска единица што истражува обвинувања за корупција, во која наводно се вклучени сопругата, братот и поранешната десна рака на Педро Санчез.

Социјалистичката членка ги негираше обвинувањата, кажувајќи им на новинарите дека спроведувала истражување за книгата и дека не работи во име на партијата или на Педро Санчез, а потоа ја напуштила Социјалистичката партија.

Лидерот на Народната партија, Алберто Нуњез Феихо, ја обвини владата за „мафијашки практики“ во аферата, тврдејќи дека Санчез е во центарот на повеќе корупциски скандали.

Народната партија процени дека повеќе од 100.000 луѓе присуствувале на денешниот митинг под слоганот „Мафија или демократија“.

Владин претставник во Мадрид процени дека на демонстрациите имало помеѓу 45.000 и 50.000 луѓе.