Велика Британија денескa ќе ја признае палестинската држава и покрај притисокот од САД и семејствата на заложниците што ги држи Хамас. Британскиот премиер, Кир Стармер, во јули објави дека Велика Британија ќе ја признае Палестина во септември доколку ситуацијата во Газа не се подобри.

Би-Би-Си објави дека Стармер и министрите од британската влада заклучиле дека ситуацијата на терен се влошила во последните недели и дека ќе го објават признавањето на Палестина во недела попладне.

Признавањето на Палестина е голема промена во британската надворешна политика откако неколку претходни влади тврдеа дека признавањето треба да дојде како дел од сеопфатен мировен договор.

Овој потег предизвика остри критики од израелската влада, семејствата на заложниците и некои конзервативци. Израелскиот Бенјамин Нетанјаху претходно изјави дека таквата одлука „го наградува теророт“.

Најавеното признавање беше критикувано и од водечките американски политичари, кои предупредија дека тоа ќе го зајакне Хамас и ќе ја загрози безбедноста на Израел.

Како што претходно најави португалското Министерство за надворешни работи, и Португалија денес официјално ќе ја признае палестинската држава.

Се очекува уште десет земји да го следат примерот на Португалија на Генералното собрание на ОН.

Новата такса од 100.000 долари за визи H-1B во Соединетите Американски Држави, која стапува во сила денеска, ќе се наплаќа по петиција и нема да се применува на постојните носители на визи кои повторно влегуваат во земјата, соопшти Белата куќа.

„Ова НЕ е годишна такса. Тоа е еднократна такса што се однесува само на петиција“, изјави портпаролката на Белата куќа, Каролин Ливит, во објава на X во саботата.

Петицијата е барање од компанија да донесе квалификуван работник од друга земја во Соединетите Американски Држави.

Ливит рече дека на сегашните носители на визи H-1B кои моментално се надвор од земјата нема да им бидат наплатени 100.000 долари за повторно влегување во Соединетите Американски Држави.

Министерот за трговија, Хауард Лутник, во петокот изјави дека таксата ќе се плаќа годишно, но додаде дека деталите „сè уште се разгледуваат“. Појаснувањето од Белата куќа во саботата претставува отстапување од изјавата на Лутник.

Ливит рече дека носителите на H-1B визи можат да ја напуштат и повторно да влезат во земјата како што би правеле вообичаено и дека новата такса ќе се применува само во следната рунда на лотарија H-1B, а не за сегашните носители на визи или обновувања.

Од Белата куќа велат дека таксата се наметнува за да се изедначи полето за игра за американските работници, за кои рече дека се „заменуваат со пониско платена странска работна сила“.

Извршната наредба со која се воведува нова такса за виза H-1B, потпишана од претседателот Доналд Трамп, би можела да ги наруши глобалните операции на индиските компании за технолошки услуги кои ги испраќаат своите професионалци во САД, соопшти претходно индискиот надзорен орган за ИТ индустријата „Наском“.

Доминик Лефевр (63) поминал една недела од годишниот одмор во Мароко, ни најмалку несомневајќи се дека ќе го пречека вистински кошмар кога ќе се врати дома.

Кога се вратил од одмор подготвен да ги плати сите сметки кои се натрупале, го забележал долгот за телефoн со огромна цифра.

Во полето каде што стоел износот пишувало: „должи: 37.621,91 евра“.

Оваа сметка не само што му ги расипала спомените од одморот, туку сериозно му ја загрозила и егзистенцијата.

Според неговиот мобилен оператор, француската телекомуникациска компанија Orange, Лефевр за време на одморот потрошил преголема количина интернет податоци. Така, наводно, се појавил толку високиот износ на сметката.

Сепак, Лефевр тврди дека својот телефон речиси и не го користел. Ни за време на претходните одмори во Мароко не се соочил со слични проблеми.

„Или сум бил жртва на хакерски напад, или на техничка грешка,“ вели тој.

Лефевр ангажирал адвокат, бидејќи – како што вели – трошокот не би можел никако да го плати.

Според извештаите, Orange тврди дека тој имал тарифен пакет што вклучувал 5 GB податоци во роаминг во Мароко. Таа граница, наводно, била надмината.

Му биле испратени вкупно 16 СМС пораки со предупредување за прекумерна потрошувачка.

Како точно дошло до толкаво пренесување податоци и до толку висок износ, сè уште не е разјаснето.

По враќањето од одмор, Orange му ја исклучил телефонската линија – која му била од суштинско значење за неговиот кафе-бар. Без интернет, 63-годишникот не можел да ја користи фискалната каса.

Во меѓувреме морал да ангажира друг провајдер за да продолжи со работењето, без да го плати побаруваниот износ на Orange.

На крајот, сепак, било постигнато компромисно решение: Orange ја намалил сметката од над 37.000 евра на 500 евра.

Овој потег бил оправдан со веродостојноста на клиентот и неговата долгогодишна лојалност. Лефевр бил клиент цели 38 години и секогаш навремено ги плаќал сметките.

Операторот и понатаму тврди дека немало ни хакерски напад, ни технички дефект.