Бомбаш самоубиец со камион се залета во воен конвој и уби најмалку осум авганистански војници, соопшти Министерството за одбрана. Уште девет војници се повредени во нападот во провинцијата Мајдан Вардак.

Никој сè уште не ја презеде одговорноста за нападот, но Талибанците и припадниците на локалната Исламска држава веќе рутински ги напаѓаат авганистанските безбедносни сили како ова, пишува АП.

Талибанците ги интензивираа нападите низ Авганистан и покрај потпишувањето на мировниот договор со САД во февруари.Договорот беше потпишан со цел да се отвори патот за разговори меѓу бунтовниците и авганистанската влада, што ќе создаде услови за ставање крај на децениската војна. Разговорите требаше да започнат овој месец, но процесот беше запрен поради бавното спроведување на договорот за ослободување на затворениците.

Со мировниот договор авганистанската влада се обврза да ослободи 5.000 заробени Талибанци во замена за Талибанците да ослободат 1.000 заробени членови на владата.

Досега, владата ослободи повеќе од 4.200, а Талибанците околу 800 заробеници.