Украинскиот претседател Волдимир Зеленски навести дека може да се постигне договор за прекин на огнот доколку украинската територија, која сега е под негова контрола, биде земена „под чадорот на НАТО“, што ќе му овозможи да преговара за враќање на остатокот од територијата на дипломатски начин.

Во интервју за „Скај њуз“, Зеленски беше замолен да одговори на медиумските извештаи дека еден од плановите на новоизбраниот американски претседател Доналд Трамп да стави крај на војната би можел да биде Киев да и ги предаде на Москва териториите што ги окупира, во замена за пристапување на Украина во НАТО.

Зеленски рече дека членството во НАТО ќе мора да им се понуди на неокупираните делови на Украина, за да се стави крај на „жешката фаза на војната“, и дека со поканата за членство, НАТО ќе мора да ги признае меѓународно признатите граници на Украина.

„Ако сакаме да ја запреме жешката фаза на војната, треба да ја земеме под чадорот на НАТО територијата на Украина што ја имаме под наша контрола“, рече Зеленски.

„Треба да го направиме тоа брзо, а потоа Украина може да ја врати (окупираната) територија преку дипломатски средства“, додаде тој.

Зеленски рече дека прекинот на огнот е потребен за „да се гарантира дека (рускиот претседател Владимир) Путин нема да се врати за да заземе повеќе украинска територија.

Тој рече дека НАТО треба веднаш да го покрие делот од Украина што останува под контрола на Киев, што, како што додаде, на Украина и е потребно многу.

Во првото интервју за британските медиуми по победата на Трамп на изборите, Зеленски беше прашан што мисли за него и рече дека Украина мора да соработува со новиот претседател за да има некој што ги поддржува.

„Сакам да работам директно со него, бидејќи тој има различни гласови од луѓето околу него, и затоа треба да не дозволиме никој околу нас да ја уништи нашата комуникација“, рече тој.

Во ова интервју, Зеленски за првпат навести дека договорот за прекин на огнот може да вклучи руска контрола над украинската територија. За време на конфликтот, Зеленски никогаш не кажа дека ќе ѝ отстапи на Русија кој било дел од окупираната украинска територија, вклучувајќи го и Крим, кој Русија го зазеде во февруари 2014 година и официјално го анектираше следниот месец, пишува „Скај њуз“.

Околу една петтина од територијата на Украина е под руска контрола.

Турскиот претседател Реџеп Таип Ердоган денеска повика на голема ревизија на Обединетите нации, јавува агенцијата „Анадолија“.

„ОН треба целосно да се реформираат. Светот не може да биде оставен на милост и немилост на пет постојани земји (членки на Советот за безбедност). Судбината на 194 земји не може да се остави во рацете на овие пет постојани членки“, рече Ердоган во Обраќање на Светскиот форум на ТРТ во Истанбул.

Ердоган го осуди системот на петте постојани членки на Советот за безбедност, според кој тие можат самостојно да стават вето на важни одлуки, велејќи: „Светот е поголем од петте“.

„Руско-украинската војна, која наскоро ќе влезе во својата четврта година, ни ја покажа слабоста на меѓународниот систем“, додаде тој.

Ердоган нагласи дека во Газа не се тестирани само хуманитарните вредности, туку и веродостојноста на глобалниот систем и на ОН. Тој смета дека чувството на вина за холокаустот ги принудило западните земји да се воздржат од критикување на Израел, кој „врши геноцид во Газа повеќе од една година“.

Тој изрази надеж дека примирјето меѓу Израел и Хезболах ќе остане трајно, но нагласи дека итно е потребен прекин на огнот во Газа.

„Итното воспоставување на одржлив прекин на огнот во Газа е неопходно пред човештвото да изгуби уште повеќе од своите вредности. Подготвени сме да сториме се за да го запреме геноцидот во Газа и да ја отвориме вратата за траен мир“, заклучи тој.

Лидерот на либанскиот Хезболах, Наим Касем, денеска изјави дека движењето постигнало голема победа, во својот прв говор по стапувањето на сила на прекинот на огнот со Израел во Либан.

„Победивме затоа што го спречивме непријателот да го уништи Хезболах, да го уништи движењето на отпорот или да го ослабне“, рече Касем во телевизиско обраќање, нагласувајќи дека „непријателот не успеал да ги постигне своите цели“.

Прекинот на огнот меѓу Израел и Хезболах стапи во сила во Либан во средата, по повеќе од една година прекугранични непријателства и два месеци отворена војна меѓу израелската војска и либанското вооружено движење поддржано од Иран.

Војната остави речиси 4.000 мртви на либанска страна, раселени речиси 900.000 луѓе според ОН и нанесе големи загуби на Хезболах. Касем, кој го наследи Хасан Насрала, кој беше убиен на 27 септември во израелски напад, вети дека ќе соработува со либанската армија, која е задолжена за спроведување на договорот за прекин на огнот.

Под покровителство на САД и Франција, договорот за прекин на огнот предвидува повлекување на израелската армија од Либан во рок од 60 дена. Хезболах мора да се повлече на околу 30 километри од границата и да ја растури својата воена инфраструктура на југ, каде што ќе бидат распоредени само либанската армија и мировниците.