Претседателот на Украина – Володимир Зеленски изјави дека Украина треба да се приклучи на ЕУ што е можно поскоро и дека процесот „не смее да трае со години“.

„Процесот на прием на членките обично трае со години бидејќи земјите мора да исполнат одредени економски и политички критериуми“ – пишува Sky News.

„Денеска потпишуваме заедничка изјава, која е сигнал за единството на сите гранки на власта и доказ за нашата решеност да ја постигнеме стратешката цел на Украина – полноправно членство во Европската Унија. Потпишувањето на оваа декларација треба да значи исто како и потпишувањето на апликацијата за влез на петтиот ден од војната. Ни требаа 115 дена за да се кандидираме. Патот до членството не смее да трае со години, децении“ – напиша Зеленски на „Телеграм“.

Украинскиот претседател е со став дека „степенот до кој тоа е можно зависи од нас. Мораме да го завршиме нашиот дел од работата совршено за да им овозможиме на нашите пријатели во Европската Унија да донесат уште една историска одлука за нас исто толку брзо, на консолидиран начин“.

Норвешка денеска попладне вети дека на Украина ќе и испрати 1,04 милијарди долари, помош за да ја издржат војната со Русија.

Оваа информација денеска во Киев ја потврди норвешкиот премиер Јонас Гар Стоере на прес-конференција со украинскиот претседател Володимир Зеленски.

Стоере рече дека се работи за пари за „помош на украискиот народ за потреби, за одбрана и за реконструкција на уништените градови“.

Чешка денеска го почнува шестмесечното претседавање со Советот на ЕУ, а според најавите од Прага, главниот фокус на европската агенда до крајот на годината ќе биде на решавање на последиците од конфликтот во Украина, почнувајќи од мигрантската криза преку енергетската безбедност и зајакнувањето на одбраната и економијата на ЕУ.

Претставниците на ЕУ веќе најавија дека за време на чешкото претседателство се очекува првиот состанок на европската политичка заедница во Прага како нов формат за паневропска соработка, во кој првпат лидерите на земјите членки на ЕУ, европската економска област и Западен Балкан треба да седнат на иста маса со Украина, Молдавија и Грузија.

„Европа во моментот се соочува со многу проблеми и предизвици, но ако дејствуваме со единство и одлучност, ќе излеземе посилни и поотпорни од овие кризи“, изјави чешкиот премиер Пер Фијала пред почетокот на претседателствувањето на неговата земја.

Инаку, ова е второ претседавање на Чешка со Советот на ЕУ во текот на 18-те години членство во Унијата.