Ерменската влада планира да ја разгледа можноста за признавање на независноста на Нагорно-Карабах, вели ерменскиот премиер Никол Пашинјан.

Тоа е област во Азербејџан со ерменско мнозинство.

„Да, треба да го разгледаме прашањето за признавање на независноста на Арках (ерменско име за Нагорно- Карабах). Тоа прашање е на нашата агенда. Треба да разговараме за тоа многу сериозно. Ги разгледуваме сите сценарија за можниот развој на настаните”, рече Пашинијан во парламентот.

Тој додаде дека вооружени судири се водат по целата линија на контакт и посочи дека и Ерменија и „нејзиниот непријател“ (Азербејџан) имаат сериозни загуби, пренесува ТАСС.

Утрово избувнаа судири меѓу ерменските и азербејџанските сили околу Нагорно-Карабах, кој прогласи отцепување од Азербејџан во 90-тите години на минатиот век.

Ерменската влада прогласи воена состојба и општа мобилизација поради ескалацијата на конфликтот во Нагорно- Карабах, а истото го стори и Азербејџан. Претходно, претседателот на непризнатата република Нагорно-Карабах, Араик Артјунјан, прогласи воена состојба и мобилизација на сите граѓани на возраст над 18 години.

Ерменија и Азербејџан се во конфликт подолго време поради одвоениот азербејџански мнозински ерменски регион Нагорно Карабах, а граничните конфликти се интензивираа последните месеци.

Претседателот на САД Доналд Трамп вели дека ќе побара неговиот противкандидат на претседателските избори, Џо Бајден да се тестира за дрога пред дебатата во вторник.

Трамп изјави дека ќе бара, пред или по предизборната дебата закажана за во вторник, неговиот противкандидат да биде тестиран за присуство на наркотици во телото. Тој додаде дека, се разбира, и самиот ќе се согласи на тестот.

Според американскиот портал Хил, Трамп и претходно барал кандидатите да се тестираат за присуство на дрога пред предизборните дебати.

Првата дебата меѓу Трамп и Бајден во пресрет на изборите во ноември е најавена за во вторник.

Белоруската полиција соопшти дека употребила солзавец и шок бомби за да ги растера, како што велат, „непослушните демонстранти“ во градот Гомел.

Така спречила пробивање на полицискиот кордон, пренесе агенцијата ТАСС.

Во Белорусија и денес продолжија протестите против резултатите од претседателските избори, на кои убедливо победи Александар Лукашенко, што опозицијата и Западот не го признаваат.

Полицијата досега уапси најмалку 53 лица низ целата земја, објави групата за човекови права Весна, пренесува Ројтерс.