Кипар го подигна нивото на тревога по нападот со беспилотни летала врз британската воена база РАФ Акротири на островот. Властите ги затворија училиштата и спроведоа евакуации каде што е потребно, бидејќи земјата е вовлечена во ескалацијата на конфликтот на Блискиот Исток.

Во утринското обраќање до нацијата, кипарскиот претседател Никос Христодулидес рече дека безбедноста на земјата е најголема грижа на неговата влада.

„Се наоѓаме во регион со исклучителна геополитичка нестабилност, со бројни предизвици и проблеми, кој во моментов поминува низ невидена криза. Правиме сè што е потребно, а безбедноста на нашата земја и граѓаните е наш врвен приоритет“, рече тој.

Тој нагласи дека Кипар, членката на ЕУ најблиску до Блискиот Исток и популарна туристичка дестинација, инсистира дека нема да се вклучи во никакви воени операции.

„Остануваме посветени на хуманитарната улога што ја имавме цело време – секогаш како дел од решението, а не како проблемот – и ќе продолжиме да дејствуваме со истото чувство на одговорност“, додаде Христодулидес.

Осврнувајќи се на нападот што се случи синоќа, ретседателот рече дека „дрон Шахед погодил воени објекти во британската база во Акротири и предизвикал мала материјална штета“.

Грчките медиуми објавија дека бил неутрализиран и втор борбен авион, кој Иран исто така го насочил кон британската база, оддалечена околу 960 километри.

фото/ЕПА

„Wings of Zion“ официјалниот авион што го користат и израелскиот премиер и израелскиот претседател, се наоѓа во посебен дел од аеродромскиот комплекс Берлин/Бранденбург. Новинар од агенцијата Дпа лично се уверил дека авионот популарно наречен израелски „Ер Форс Уан“ се наоѓа на североистокот на Германија, пишува ДВ.

Според Дпа, израелскиот државен авион полетал од аеродромот во Бершеба во саботата по нападот на Израел и САД врз Иран. После тоа, како што објави веб-страницата „Флајтрадар“, тој кружел над Медитеранот со часови пред конечно да слета на аеродромот Берлин/Бранденбург, југоисточно од германската престолнина.

Ниту аеродромот ниту израелската амбасада во Германија не одговориле на медиумските прашања за намената на државниот авион Боинг 767, кој официјално е дел од израелските воздухопловни сили.

Преместувањето на авионите надвор од Израел е дел од стандардната безбедносна процедура што се практикувала и за време на минатите конфликти со Иран кога ракети и беспилотни летала паѓале врз Израел. Боингот 767 е во сопственост на Израел од 2016 година, кога авионот беше купен од австралиската компанија „Квантас“, која го управуваше 20 години.

Стотици илјади патници се блокирани низ целиот свет откако клучните воздушни центри на Блискиот Исток беа затворени по нападите на САД и Израел врз Иран. Уште 100 летови беа откажани во понеделник, со што се прошири хаосот во глобалниот воздушен сообраќај и се влошија работите за патниците. Ова е најлошиот удар врз авијацијата од пандемијата Ковид-19, пишува The Guardian.

Главните аеродроми на Блискиот Исток, вклучувајќи го и Дубаи, најпрометниот меѓународен центар во светот, беа затворени трет ден по ред. Според платформата за следење на летови FlightAware, речиси 2.800 летови беа откажани во саботата и 3.156 во неделата. Само во раните утрински часови во понеделник, веќе беа откажани 1.239 летови. Emirates од Дубаи, Etihad Airways од Абу Даби и Qatar Airways од Доха откажаа стотици летови, додека други превозници како Air India, исто така, ги суспендираа услугите во регионот.

„Нема светла страна за патниците“, рече Хенри Хартевелдт, аналитичар за авијациската индустрија и претседател на Atmosphere Research Group. „Тие треба да бидат подготвени за одложувања или откажувања во следните неколку дена, додека нападите се одвиваат и се надеваме дека ќе завршат.“

Глобални последици од конфликтот
Според страницата за следење летови Flightradar24, воздушниот простор над Иран, Ирак, Кувајт, Израел, Бахреин, ОАЕ и Катар остана во голема мера празен во понеделник.

Последиците се чувствуваат далеку над Блискиот Исток, со патници заглавени на дестинации од Бали до Франкфурт. Конфликтот се прошири и во Либан, каде што Израел изврши воздушни напади откако Хезболах испука ракети, затворајќи голем дел од воздушниот простор на регионот. Дополнително на проблемот е што екипажите и пилотите сега се расфрлани низ целиот свет, што го отежнува продолжувањето на летовите откако ќе се отвори воздушниот простор.

Додека повеќето патници се борат да пристапат до информации, супербогатите наоѓаат алтернатива. „Саудиска Арабија во моментов е единствената реална опција за луѓето кои сакаат да го напуштат регионот“, изјави за Семафор Амир Наран, извршен директор на брокерската куќа за приватни авиони Vimana Private, проценувајќи дека цената на лет со приватен авион од Ријад до Европа може да достигне до 350.000 долари.