Во Индија во последните 24 часа се пријавени 46.790 нови случаи на коронавирус, што е најнизок дневен биланс за речиси три месеци.

Со тоа продолжи трендот на опаѓање на бројот на новозаразени по врвот во септември, а вкупниот број на пријавени случаи сега изнесува речиси 7,6 милиони, со што Индија е втора во светот по САД, пренесува „Ројтерс“.

Според најновите податоци пријавени се 587 смртни случаи, така што вкупниот број на смртни случаи сега е 115.197.

Во Австрија бројот на новозаразени со коронавирус останува на високо ниво, а во изминатите 24 часа се регистрирани 1.524 нови случаи.

Ова беше утврдено врз основа на 19.469 спроведени тестови.

Во споредба со минатата недела, тоа е раст од околу 50 проценти.

Најголем број новозаразени има во Виена, 333.

Потоа следува Тирол со 292 новозаразени, а потоа Горна Австрија со 243.

Во моментов, во Австрија има 15.471 активен пациент, од кои 889 се хоспитализирани, што е за 90 повеќе од вчера, додека бројот на пациенти на интензивна нега е непроменет, 145.

Во изминатите 24 часа починале 10 лица, така што вкупниот број на смртни случаи од Ковид-19 се зголеми на 914.

Од почетокот на епидемијата на коронавирус во Австрија, на крајот на февруари, вкупно 67.792 лица биле позитивно тестирани за коронавирус, а 51.407 биле излекувани.

Ако победи на претседателските избори во САД, Џо Бајден ќе биде силно посветен на консолидирање на мирот и стабилноста на Западен Балкан, преку зајакнување на сојузот со ЕУ и НАТО, објавија од изборниот тим на демократскиот кандидат за претседател на САД.

Составен дел од изборната програма на Бајден е и делот поврзан со приоритетите во надворешната политика, а исто така и Југоисточна Европа најде место меѓу нив. Посебно се истакнува најавата за ангажман на САД во БиХ, а оваа информација на неговиот фејсбук-профил ја сподели во вторникот Елвир Клемпиќ, по потекло од БиХ, кој е одговорен за односите со етничките заедници во САД во изборниот штаб на Бајден.

„Џо Бајден ќе ги обедини нашите партнери во рамките на ЕУ и НАТО за заеднички развој на стратегија за зајакнување на позицијата на Западен Балкан во евро-атлантските институции. Џо Бајден знае дека е време храброто и одлучно американско раководство да ги поттикне реформите и помирувањето, со цел повторно да се посветиме на нашата долго ветена цел за целосна, слободна и мирна Европа. Џо Бајден е посветен на тоа дека ќе биде засекогаш против омразата и ќе ги поддржи суверенитетот, територијалниот интегритет и мултиетничкиот карактер на Босна и Херцеговина“, се вели во програмата.