Кинескиот претседател Шји Џинпинг изјави денеска во Москва дека Кина е одлучно подготвена, заедно со Русија, да го поддржи меѓународниот систем во чиј центар се ОН, во денешниот турбулентен свет и да се залага за светски поредок заснован на меѓународното право.

„ Кина и Русија, како големи сили и постојани членки на Советот за безбедност на ОН, играат важна улога во меѓународните работи. Во свет далеку од мирен, Кина е подготвена заедно со Русија одлучно да го брани меѓународниот систем во чиј центар се ОН, да го зачува светскиот поредок заснован на меѓународното право и основните норми на меѓународните односи засновани на целите и принципите на Повелбата на ОН, придржувајќи се до вистинскиот мултилатерализам, промовираат глобална мултиполарност и демократизација на меѓународните односи, промовираат развој на глобалното владеење на поправедна и порационална насока“, рече Шји по пристигнувањето во Москва.

Како што јави РИА Новости, претседателот на Кина рече дека има намера да разговара со претседателот на Русија за важни регионални и меѓународни теми од заеднички интерес.

„За време на посетата, очекувам да имам темелна размена на мислења со претседателот Владимир Путин за прашања од билатералните односи и важни регионални и меѓународни теми од заеднички интерес, како и да изложам план за развој на стратешка интеракција и практична соработка“, рече тој.

Убеден е дека неговата посета на Москва ќе биде плодна.

„ Уверен сум дека посетата ќе биде плодна и ќе даде нов поттик за здрав и стабилен развој на кинеско-руските односи на сеопфатно партнерство и стратешка соработка во новата ера“, рече кинескиот претседател.

Кинескиот лидер рече дека двете земји имаат долгогодишно пријателство меѓу нивните народи. Џинпинг до 22 март е во посета на Русија на покана на рускиот претседател Владимир Путин.

Оваа посета е негово прво патување во странство откако беше реизбран за шеф на државата по трет мандат.

Со своите плажи, опуштениот начин на живеење и чувството дека секогаш е празник, Бали беше тропски рај до почетокот на војната во Украина. И тогаш почнаа да пристигнуваат Русите и Украинците и работите излегоа од контрола.

Од почетокот на војната во февруари 2022 година познатото одморалиште во Индонезија стана магнет за Русите и Украинците, кои сакаа да избегаат од пеколот на војната.

Но, оние што избегаа од војната или мобилизацијата почнаа да прават пекол во рајот. Минатиот викенд властите на Бали ги повикаа индонезиските власти да ја прекинат политиката за издавање визи на граѓаните на Русија и Украина по пристигнувањето во земјата. Како што се наведува, причината за тоа се многуте инциденти, кои вклучуваат грдо однесување и разни примери на прекршување на визниот режим, како што е престојот во таа земја подолго од пропишаниот рок со визата, па дури и незаконската работа, во која тие најчесто се вработуваат како неовластени туристи, водичи, таксисти и фризери.

Многу Украинци на Бали беа шокирани од оваа објава тврдејќи дека во повеќето инциденти учествувале Руси и дека неправедно биле обвинети.

Туристите на Бали често ги полнат колумните во весниците со инциденти на пијанство и несоодветно однесување, како и со голотија и непочитување на светите места.

Си-ен-ен побара коментар од Амбасадата на Русија во Индонезија и Конзулатот на Украина на Бали. Руската амбасада не одговори, а украинскиот конзулат соопшти дека мнозинството од нивните граѓани на тој остров се жени и деца што „не ги кршат правилата и законите“.

Она што го прави Бали особено привлечен за туристите од повеќе од 80 земји е тоа што визата се добива при влез во земјата. Визата важи 30 дена, но можно е да се продолжи на 60.

Во слабо осветлена просторија десетина мажи во руски воени униформи и скриени лица стоеја околу војник кој читаше писмо упатено до претседателот Владимир Путин.

„Ние сè уште не сме добиле оружје и муниција до денес“, рече човекот, чија единица сега е стационирана во Донецк, во источна Украина.

„Бараме нашите момчиња да се повлечат од овој напад бидејќи ги немаат потребната обука или искуство“, рече тој.

Неговиот глас беше компјутерски изменет за да се заштити неговиот идентитет.

„Почитуван Владимир Владимирович, ве молам, решете ја оваа ситуација“, рече тој.

Апелот, кој се појави на „Телеграм“ овој месец, беше само еден од серијата нови видеа што се појавија од средината на февруари, во кои неодамнешните руски регрути се жалат дека биле испратени да се борат и да загинат на првите линии во Украина користејќи термини, како што се „криминални наредби“ и „бесмислени напади“.

Еден руски медиум, „Вјорстка“, пресмета дека во рок од еден месец регрути од најмалку 16 региони во Русија се појавиле на видеа што повикуваат на интервенција на Путин. Во нив десетици регрути се жалат дека биле принудени да упаднат на украинските позиции, без доволно обука, муниција или оружје.

Регрутите се жалат и дека им било дадено оружје и им било кажано да трчаат кон непријателските позиции и да пукаат. Во едно видео, снимено на 7 март, војниците на единицата од Иркутск, град во Сибир, се жалат дека се „испратени на колење“, а ова е нивен трет јавен апел до Путин. Една група регрути од Калининград, Мурманск и од Архангелск, кои се претставија како „Единица 41698“ на 5. моторизирана бригада, изјавија дека во нивниот прв напад во само еден ров биле убиени дури шест соборци.

„Луѓето умираат за ништо. Ние не сме месо. Подготвени сме да се бориме достоинствено“, вели еден од нив.

Друго видео, наводно снимено од 1453. полк од Перм и Свердловската област на Урал на 11 март, зборува за „неоправдани загуби“ и вели дека четворица биле убиени, а 18 ранети за време на неодамнешниот напад.

Видеата исто така го откриваат неуспехот на Москва да се справи со критичните и срамни проблеми со снабдувањето, што доведе до вооружување на војниците со оружје и униформи од Втората светска војна. Некои од тие поплаки првпат беа емитувани минатата есен преку видеа што почнаа да се појавуваат набргу откако Русија почна делумна воена обврска.

Но, како што пишува „Вашингтон пост“, руските власти не одговориле на овие видеопораки, а засега нема знаци дека претседателот Путин ќе одговори на апелите. Во ноември, за време на договорената средба со група мајки на војници, Путин реагира многу негативно на видеата од тоа време: „Не треба целосно да му верувате на интернетот бидејќи тој е полн со секакви лажни приказни, измами и лаги, рече Путин.

Но, и после тоа, мајките и ќерките на мобилизираните борци снимиле нови пораки, кои ги испратиле до руските власти. Во едно видео, објавено на 12 март, дваесетина жени апелираа до Путин и до министерот за одбрана Сергеј Шојгу да ги тргнат своите мажи од линијата на огнот.

„Нашите луѓе се испратени како месо да напаѓаат добро одбранети точки, петмина против 100 добро вооружени непријатели. Тие се подготвени да ја почитуваат својата должност кон својата земја според специјализацијата за која се обучени, а не како јуришна пешадија“, рече една жена.

Исто така, во повеќето видеа регрутите внимаваат да кажат дека се посветени на воената должност и сакаат да продолжат да се борат за својата земја. Повеќето од регрутите презедоа чекори за да го скријат својот идентитет.