Бројот на починати од коронавирус во Велика Британија денеска надмина 50.000, според официјалните податоци до кои дојде „Ројтерс“.

Новите податоци од Шкотска покажуваат дека бројот на починати се зголемил на 50.059 во моменти кога британскиот премиер Борис Џонсон се обиде да ги ублажи рестриктивните мерки, наведува агенцијата.

Податоците на британската агенција за починати се состои од податоци од некролозите во кои се споменува Ковид-19 како причина за смртта во Англија, Велс и Северна Ирска до 22 мај и во Шкотска до 31 мај.

За разлика од податоците кои владата дневно ги соопштува, некролозите во кои се споменува Ковид-19 вклучуваат сомнителни случаи. Податоците на „Ројтерс“ вклучуваат и починати во англиските болници по 23 мај и во Велс и во Северна Ирска.

Претседателските избори во Полска ќе се одржат на 28 јуни, изјави претседателката на долниот дом на парламентот, Елзбиета Витек, поставувајќи нов датум за избори кои првично беа закажани за 10 мај, но беа одложени поради пандемијата на коронавирус.

„Многу би сакала конечно да можеме да избереме шеф на државата. Тоа е прашање на полската државност“, рече Витек во телевизискиот говор, најавувајќи го новиот датум за избори.

Изборите првично беа закажани за 10 мај, но беа откажани четири дена порано, бидејќи конзервативната влада не успеа да се согласи со опозицијата за начинот на нивното одржување, со оглед на епидемијата на коронавирус и сомнежите за нивната легитимност.

Новиот датум поставен од Витек се совпаѓа со оној што го застапуваше водачот на нејзината партија „Право и правда“  (ПиС), Јарослав Качински.

Некои аналитичари сметаат дека ПиС сакал да ги организира изборите што е можно поскоро за да се гарантира новиот мандат на сегашниот претседател Анджеј Дуда, кој е нивен кандидат.

Популарноста на Дуда се намалува со текот на времето бидејќи кризата предизвикана од пандемијата започнува да ја ослабува полската економија.

Дел од анкетите предвидуваат негов пораз во вториот круг од либералниот кандидат, актуелниот градоначалник на Варшава, Рафал Трзасковски.

Германската влада го укинува генералното предупредување за патување во земјите од Европската Унија, како и во Велика Британија, Норвешка, Исланд и Лихтенштајн од 15 јуни, објави во Берлин германскиот министер за надворешни работи, Хаико Мас.

„Од 15 јуни, предупредувањата се укинати, се разбира под претпоставка дека ситуацијата со пандемијата на коронавирус не се менува“, рече Хаико Мас по состанокот на германската влада.

По 15 јуни се укинуваат предупредувањата кои се однесуваат за земји во кои владее опасност од тероризам или војна. Наместо тоа, се враќаат вообичаените упатства за патување во одделни земји.

Така, патувањето во Велика Британија сè уште не се препорачува поради двонеделниот карантин што е на сила таму при влегувањето во земјата.

Истото важи и за Норвешка и Шпанија, каде сè уште е на сила забраната за влез, но која, како што објасни Мас, треба да се укине по 15 јуни.

„Укинувањето на предупредувањето не значи покана за патување во исто време“, рече Мас, додавајќи дека и по 15 јуни треба да се проверуваат упатствата за патување во одделни земји.

Германскиот министер за надворешни работи предупреди дека во никој случај нема повторно да се преземе никаква акција за враќање на германските туристи од странство преку воздушни мостови, како што беше случајот во март и април годинава кога повеќе од 250.000 туристи беа префрлени во Германија од целиот свет.

За ставот кон патувањето во земји надвор од Европската Унија, германската влада ќе се разговара на една од идите седници.