Шеснаесет членови на Европскиот парламент побараа од министерот за надворешни работи на ЕУ, Џозеп Борел, да го смени амбасадорот на ЕУ во Куба, Алберт Наваро, бидејќи тој наводно се приклонил на тамошниот режим, кој ниту ги почитува ниту ги брани човековите права.

„Сакаме да ја искажеме нашата збунетост и неодобрување за невообичаеното и редовно однесување на амбасадорот на Европската Унија во Куба, г. Алберт Наваро“ – се наведува во писмото потпишано од пратениците од Европската народна партија (ЕПП), „Изгради ја Европа“ и групите на Европските конзервативци и реформатори, пренесува бриселски „Политико“.

Пратениците изјавија дека Наваро, меѓу другото, потпишал и писмо упатено до претседателот на САД, Џо Бајден, во кое бара укинување на американските санкции за Куба и немешање во нејзините работи.

Пратениците заклучија дека Наваро зазема политички ставови слични на оние на режимот во Куба и дека си дозволува слободи кои се потипични за политички лидер отколку за дипломатски претставник.

„Политико“ наведува и дека портпаролот на Борел не бил достапен за коментар.

Француските власти размислуваат за тринеделно затворање на Париз со цел да се потисне ширењето на коронавирусот.

Првиот заменик-градоначалник на Париз, Емануел Грегоар, објави дека до француската влада ќе достави план со кој се пропишува превентивно тринеделно затворање на главниот град, со цел подоцна да се создадат услови за повторно отворање на сите места, вклучително и барови, ресторани и театри.

Како и во остатокот од земјата, во Париз е во сила ноќен полициски час од 15 декември, а рестораните и културните институции, како и на други места во Франција, се затворени со недели за да се спречи ширењето на инфекцијата.

Францускиот премиер Жан Кастекс претходно изјави дека владата ќе воведе мерки, вклучително и затворање за време на викендот во Париз и уште 19 други региони од почетокот на март, доколку епидемијата со коронавирусот продолжи да се шири.

Во интервју за „Франкфуртер алгемајне цајтунг“, германската канцеларка Ангела Меркел призна дека луѓето ја одбиваат вакцината на „Астразенека“ затоа што се загрижени за ефективноста и безбедноста на вакцината, што пак е последица на лошиот публицитет.

„Има проблем со прифаќањето на вакцината на ‘Астразенека’. Тоа е сигурна вакцина, безбедна и ефикасна. Одобрена од ЕМА, а во Германија се препорачува за лица под 65 години. Сите релевантни органи ни велат дека ова е вакцина на која можеме да и веруваме. Во време кога нема доволно вакцини, не можеме да избереме со што ќе се вакцинираме“, рече Меркел во едно интервју.

На прашањето дали самата ќе биде вакцинирана со „АстраЗенека“, Меркел одговори: „Имам 66 години и не спаѓам во групата на која и беше препорачано да се вакцинира со ‘Астразенека’“.