Министерот за надворешни работи на Италија, Луиџи Ди Мајо сака месецов да овозможи патување во земјата без задолжителен карантин за туристите. Ова е дел од заложбата да се поттикне туризмот во оваа земја кој трпи голема штета за време на пандемијата.

Патувањето во Италија би требало да биде потполно олеснето за оние кои се вакцинирани против Ковид-19.

Ди Мајо рекол дека во соработка со министерот за здравство разговараат за можноста да нема повеќе карантин за граѓаните на Европска унија и патниците од Израел кои имаат негативен тест на вирусот, оние кои се вакцинирани и тие кои ја прележале болеста.

Патниците кои доаѓаат во Италија, во моментов мораат да се тестираат непосредно пред патувањето, да поминат петдневен карантин и потоа повтрно да се тестираат.

Во романската туристичка атракција во Трансилванија е организиран пункт за вакцинација од Ковид-19.

Докторите и медицинските сестри на својата заштитна опрема носат налепници со вампирски заби, и бесплатно на посетителите им нудат вакцини на „Фајзер“.

Медицинските лица на шега им велат на посетителите на дворецот дека од таму ќе излезат со белег на раката а не на вратот.

Францускиот претседател, Емануел Макрон, ги обвини Велика Британија и САД за блокирање на извозот на вакцини против коронавирус, пишува британскиот весник „Телеграф“.

Макрон вели дека е подготвен да го разгледа повикот на американскиот претседател, Џо Бајден, производителите на вакцини за коронавирус да се одречат од патентните права, но истакна дека во глобалната борба против коронавирусот многу е поважно Вашингтон да ја укине забраната за извоз на вакцини.

„Денес, Англосаксонците блокираат многу состојки и вакцини, а 100 проценти од дозите произведени во САД се наменети за нивниот пазар“, нагласи Макрон, истакнувајќи дека ЕУ се бори вакцините да бидат јавно добро.