Поранешната хрватска министерка за надворешни работи, Марија Пејчиновиќ-Буриќ, официјално ја презеде функцијата генерален секретар на Советот на Европа.

Таа е втора жена и прв политичар од централна и источна Европа на оваа позиција. Во крајното гласање, таа го победи Белгиецот Диди Рејндерс.

Поранешната шефица на хрватската дипломатија положи заклетва во седиштето на СЕ во Стразбур.

Пејчиновиќ Буриќ дојде на местото на Норвежанецот Торбјорн Јагланд.

Премиерот на Израел, Бенјамин Нетанјаху, го откажа учеството на Генералното собрание на Обединетите нации.

Патот за Њујорк е откажан по вчерашните парламентарни избори на кои нема јасен победник и Нетанјаху, судејќи според неофицијалните резултати, нема мнозинство во парламентот заедно со неговите сојузници, десничарските и верските партии.

Нетанјаху требаше да се сретне и со американскиот претседател Доналд Трамп следната недела во Њујорк. Не е соопштено дали средбата на двајцата лидери ќе биде презакажана.

Индија денеска најави забрана за електронските цигари со образложение дека таквата консумација на производи со тутун претставува здравствен ризик, особено за младите луѓе, пренесува Си-ен-ен.

„За жал, е-цигарите првично беа промовирани како добар начин за откажување од пушењето. Тие требаше да им помогнат на пушачите да се откажат од пушењето“, рекла индиската министерка за финансии, Нирмала Ситараман.

Таа додала дека Владата одлучила дека дошло време да ги преземе неопходните мерки за да не се загрози здравјето на граѓаните.

Ситараман објаснила дека индиските власти биле загрижени од информациите за смртта на седум лица во САД поради заболувања на белите дробови поврзани со употреба на електрични цигари. Инаку, неколку стотици луѓе се лекуваат од болест на белите дробови во 36 држави во САД, а научниците и медицинските установи испитуваат точно како оваа болест е поврзана со употребата на е-цигари.

Министерката за финансии рекла дека ќе биде издадена итна уредба во наредните неколку дена со која ќе се забрани употребата на електрични цигари. Уредбата потоа ќе биде одобрена од парламентот и ќе се претвори во закон.

Забраната ќе ги опфати производството, увозот, извозот, транспортот, продажбата, дистрибуцијата, складирањето и рекламирањето на е-цигари.

Сторителите кои прв пат ќе го прекршат законот ќе се соочат со затворска казна до една година и парична казна од 100.000 рупии (околу 1.270 евра). За повторно прекршување казната ќе биде до пет години затвор и парична казна од 500.000 рупии (околу 6354 евра).