Свет
Детето мигрант кое се удави во Ла Манш е всушност 28-годишен маж

Француските обвинители велат дека се чини оти 16-годишниот мигрант кој се удавил во Ла Манш, всушност бил 28-годишен маж, чии роднини тврдат дека Франција претходно му го одбила барањето за азил, пренесува „Тајмс“.
Заменик-јавниот обвинител во Булоњ-сур-Мер, Филип Сабатје, го идентификуваше удавениот мигрант, Суданецот Абдулфтах Хамдалах, кој престојувал во озлоглазениот мигрантки камп „Џунгла“ во Кале околу два месеца пред неговото несреќно патување.
Извештаите во медиумите претходно го опишаа удавениот мигрант како 16-годишно дете, цитирајќи ја францусата министерка-делегат за државјанство, Марлен Шапа, која само ги повторила информациите за возраста што ја обезбедиле спасувачите од друг патник на чамецот.
Новата возраст дадена од Сабатје, заснована на пронајдената патна исправа, е во спротивност со овие претходни извештаи.
„Не знам дали тој поднел барање за азил кај британските власти, но се чини дека го сторил тоа кај француските власти“, изјави обвинителот за „Индипендент“.
Некои политичари во Франција, кои дозволија да процвета кризата со мигрантите со тоа што не успеаја да ги контролираат своите граници, дозволувајќи на крајбрежјето да никнуваат нелегални кампови, одбивајќи да ги запрат или да ги вратат назад повеќето чамци што ги откриваат на море, ја обвинија Велика Британија за давењето на Хамдалах.
„Уште колку трагедии ќе бидат потребни за Британците да си ја вратат човечноста?“, праша Пјер-Анри Думон, член на француското национално собрание што го претставува Кале, навидум игнорирајќи го фактот дека удавениот човек веќе бил одбиен за азил од Франција.
Думон посочи дека неможноста да аплицираат за азил во Велика Британија без физичко присуство ги предизвикува овие трагедии, иако не е јасно како тоа би помогнало во ситуацијата зашто мигрантите во Франција – безбедна, прва земја членка на ЕУ – речиси во сите случаи се одбивани како нелегитимни бегалци.
Велика Британија презеде стотици наводни деца мигранти од Франција во 2016 година, по притисокот на активистите како лордот Дабс, кои ги споредуваа со еврејските деца кои избегале од Германија и делови од Европа пред избувнувањето на Втората светска војна.
Шемата беше стопирана кога стана очигледно дека мигрантите кои пристигнуваат во програмата „Дабс“, во голема мерка се млади луѓе кои тврдат дека имаат 16 или 17 години, а не мали деца, иако според изгледот повеќе личеле на мажи во доцните триесетти, отколку на тинејџери.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Изгаснат е големиот пожар во пристаништето во Хамбург

Пожарникарите успеаја да го изгаснат огромниот пожар што вчера уништи магацин во северното германско пристаниште Хамбург, соопштија официјални лица.
Околу 120 пожарникари ги гасат преостанатите пламени, но најголемиот пожар на местото е изгаснат.
„Пожарот во големата сала сега е изгаснат“, изјави портпаролот на противпожарната бригада за ДПА, напладне.
Сè уште е премногу опасно да се приближи до центарот на пожарот, за кој се верува дека е предизвикан од запален автомобил во магацин.
„Имаше дополнителни експлозии предизвикани од резервоари за гас под притисок“, рече портпаролот, а областа засега останува блокирана.
Полициските истражители не беа во можност да започнат истрага на местото на настанот поради присуството на токсични гасови.
Шест лица беа првично повредени во пожарот што избувна вчера попладне во округот Ведел на југоистокот на Хамбург. Едно лице е во критична состојба, а друго е сериозно повредено.
Тројца пожарникари на местото на настанот беа последователно повредени од експлозии, а еден мотоциклист беше повреден од летечки остатоци на автопатот А1. Дваесет и пет лица беа спасени од областа, некои со брод.
Непосредната опасност од пожар беше дополнително зголемена од цилиндрите со гас под притисок складирани во магацин кои експлодираа по неколку часа, од кои некои беа фрлени неколку стотици метри во воздух и предизвикаа повеќе пожари во околината.
фото: принтскрин
Европа
Зеленски објави кои земји ги разгледува Украина за преговори со Путин

Украинскиот претседател Володимир Зеленски денеска изјави дека Турција, заливските или европските земји би можеле да бидат домаќини на разговори со рускиот претседател Владимир Путин.
Зеленски бара директни разговори со Путин за да се стави крај на војната во Украина, но рускиот министер за надворешни работи Сергеј Лавров рече дека не е подготвена агенда за таков состанок.
„Па, оваа недела ќе има контакти со Турција, со земјите од Заливот и со европските земји кои би можеле да бидат домаќини на разговори со Русите“, рече Зеленски во видео обраќање.
„Од наша страна, работите ќе бидат максимално подготвени за да се стави крај на војната.“
Зеленски рече дека разговорите зависат од координацијата со украинските партнери, првенствено со САД, за да се обезбеди доволен притисок врз Русија. Ова беше дискутирано вчера во Киев со американскиот претставник Кит Келог.
„Сè понатаму зависи строго од волјата на светските лидери, од кои најважни се САД, да извршат притисок врз Русија“, рече тој.
„Русија само дава сигнали дека ќе продолжи да избегнува вистински преговори. Ова може да се промени само со силни санкции, силни царини – вистински притисок.“
фото: принтскрин
Свет
(Фото) Трамп изврши едно од најдраматичните реновирања на Овалната соба: Никогаш не можете да споредите злато со боја, златото е злато

Трамп изврши едно од најдраматичните реновирања на Овалната соба во поновата историја за време на својот втор мандат, трансформирајќи го традиционално строгиот простор во раскошна сцена украсена со злато.
Најзабележителна промена е додавањето на бројни златни орнаменти низ целата канцеларија. Златни украси сега го красат делот на таванот висок 5,5 метри, додека златни медалјони и резби се поставени на каминот.
Трамп лично го надгледуваше поставувањето на тие детали, работејќи со мајстори од Флорида кои претходно работеа на неговиот имот Мар-а-Лаго.
„Со години, луѓето се обидуваа да направат златна боја што изгледа како вистинско злато, и никогаш не го направија тоа. Никогаш не можете да споредите злато со боја, затоа златото е злато“, им рече тој на новинарите.
Трамп ги претвори ѕидовите во она што тој го нарекува „галерија“, со речиси 20 портрети на претседатели и државници што ги почитува. Тоа е големо отстапување од шесте портрети на Бајден и минималистичкиот пристап на Обама. Портретите се прикажани во украсни златни рамки, а воен портрет на Џорџ Вашингтон е истакнат над каминот.
Трамп го врати и познатото црвено копче на бирото, познато како Diet Coke Button, преку кое ги повикува вработените да му го донесат неговиот омилен пијалок.
Канцеларијата сега изобилува со декоративни предмети од архивите на Белата куќа, вклучувајќи седум златни урни и вазни на каминот, а раскошни рококо огледала сега ги красат влезовите.
Повеќе од пет децении, местото беше дом на шведски бршлен, растение кое се смета за симбол на континуитет и стабилност во претседателството на САД.
Дури и малите детали го носат потписот на Трамп. Златни подметачи со неговото име и бројот „47“ (47-миот претседател на Соединетите Американски Држави) стојат на масички за кафе.
фото: принтскрин