Рекордни 19.644 случаи на коронавирус се потврдени во Италија во последните 24 часа, така што вкупно 504.509 лица се заразени во таа земја од почетокот на пандемијата.

За еден ден починаа 151 лице, а досега вкупно 37.210 лица.

Премиерот Џузепе Конте рече дека сака да избегне повторно воведување на целосно затворање на земјата, што помогна да се намали ширењето на епидемијата минатата пролет, пренесува „Ројтерс“.

Регионите на Шпанија денеска ја повикаа шпанската влада да воведе вонредна состојба, што ќе ја постави правната основа за воведување полициски час во борбата против пандемијата на коронавирус.

Десет шпански региони ја повикаа владата да прогласи вонредна состојба, што ќе им овозможи да воведат ограничувања на движењето на луѓето.

Регионите очекуваат владата да свика вонреден министерски совет во недела за да ја одобри мерката, објавија шпанските медиуми, вклучително и весникот Ел Паис.

Регионот Мадрид се противи на воведувањето полициски час

Додека многу региони се склони да воведат некаква форма на полициски час, регионот Мадрид се противи на тоа, што досега спречуваше одлуката да биде иницирана на национално ниво.

Шпанија има најголем број на зараза со коронавирус меѓу западноевропските земји. Вкупниот број на заразени се искачи на 1.046.132 во петокот, додека починаа речиси 28.000 лица кои биле заразени со коронавирус.

Каталонија во петокот вечерта објави дека ќе воведе полициски час во целиот регион

Каталонија во петокот вечерта објави дека ќе воведе полициски час во целиот регион, вклучително и Барселона, веднаш штом централната влада преземе чекори. Потпретседателот Пере Арагонес рече дека е потребно да се воведе децентрализирана вонредна состојба во која каталонската влада ќе го задржи целиот капацитет за управување, притоа предупредувајќи дека развојот на ситуацијата во пандемијата е загрижувачки, и покрај сите напори.

Некои региони размислуваат за воведување вонредна состојба на други начини, преку одлуки донесени во регионалните судови, доколку централната влада не одговори на нивните барања.

Премиерот Педро Санчез веројатно ќе има доволно гласови во парламентот за да воведе вонредна состојба доколку владата одлучи да го стори тоа.

Во Брисел, од понеделник, 26 октомври, маските повторно ќе бидат задолжителни насекаде и во секое време, а полицискиот час ќе биде продолжен и на граѓаните ќе им биде забрането да ги напуштаат своите домови од 22 до 6 часот наутро.

Работата од дома е задолжителна – каде што тоа е изводливо, а сите културни и спортски објекти се затворени, одлучија градоначалниците на 19 градски општини, зајакнувајќи ги мерките за заштита од ширење на Ковид-19.

Продавниците мора да бидат затворени во 20 часот, а луѓето мора да одат во продавница сами, освен ако не се придружени од деца под 12 години и лице на кое им е потребна помош.

Сите училишни екскурзии се откажани, а властите ги повикаа родителите да не организираат традиционално собирање на слатки од врата до врата за Ноќта на вештерките.

Белгија е на „црниот врв“ на ЕУ кога станува збор за епидемиолошката состојба со 10.198 заразени на 100.000 жители, додека во Брисел, секој четврти тестиран граѓанин е позитивен на Ковид-19.