Свет
Директорот на „Ербас“: Европа мора да ги зголеми трошоците за одбрана
Европа не е подготвена за војна со Русија или за ризикот дека поранешниот американски претседател Доналд Трамп, доколку се врати во Белата куќа, би можел да ги повлече Америка од НАТО и затоа мора да ги зголеми трошоците за одбрана, изјави извршниот директор на „Ербас“, Гијом Фори.
Фори, извршен директор на најголемата европска компанија за воздухопловство и одбрана, изјави за „Гардијан“ дека сега е одлучувачки момент за зајакнување на одбранбената индустрија на континентот откако руската инвазија на Украина доведе до војна на границите на Западна Европа. Фори оцени дека европските држави досега премногу се потпираа на Америка кога станува збор за набавка на оружје и воена опрема и дека како резултат на тоа не развиле соодветни капацитети во клучните области на одбраната.
Фори рече дека Европа треба сериозно да ги сфати предупредувањата на Трамп дека Америка може да се повлече од НАТО и да се подготви за такво сценарио. Извршниот директор на „Ербас“ ги повика Европа и Велика Британија да ги здружат силите и да ги спојат програмите на ривалските борбени авиони. „Ербас“ произведува воена опрема и половина од комерцијалните авиони на глобално ниво.
Рускиот претседател Владимир Путин неодамна им порача на земјите од НАТО дека ризикуваат да предизвикаат нуклеарен конфликт доколку испратат свои војници да се борат во Украина, потсетува „Гардијан“ и додава дека ова е одговорот на Путин на изјавата на францускиот претседател Емануел Макрон дека не ја исклучува можноста оти во иднина европските земји испраќаат свои војници во Украина, пренесува „Танјуг“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Путин: Русија и Иран сакаат да воспостават мултиполарен светски поредок
Рускиот претседател Владимир Путин денеска изјави дека зајакнувањето на трговската и економската соработка е главен приоритет во односите со Иран, пренесува „Анадолија“.
За време на средбата со иранскиот претседател Масуд Пезешкијан на маргините на самитот на БРИКС во 2024 година во Казан, Путин рече дека меѓувладината комисија е задолжена за спроведување на различни проекти.
Путин, меѓу другите важни руско-ирански заеднички проекти, го спомена и развојот на иранската железничка инфраструктура како дел од промоцијата на големиот проект меѓународен транспортен коридор Север-Југ, како и изградбата на втората и третата електрана Бушер.
Рускиот претседател изрази оптимизам дека Договорот за слободна трговија меѓу Иран и Евроазиската економска унија ќе биде потпишан до крајот на оваа година.
„Генерално, би сакал да истакнам дека пристапите на Русија и Иран кон глобалната агенда се повеќе или помалку слични или идентични. Ние сме обединети во нашата желба да воспоставиме праведен мултиполарен светски поредок, да ги почитуваме меѓународните норми и да ја задржиме централната улога на Обединетите нации“, рече Путин.
Пезешкијан истакна дека тој лично го надгледувал спроведувањето на одредени договори бидејќи ги смета односите со Русија „стратешки“.
„Нашите односи се од стратешка природа – во интерес на нашите земји е да одиме напред заедно. Нашиот драг сосед Русија е голема земја“, рече Пезешкијан.
Иранскиот претседател повика на поголема соработка во рамките на БРИКС и другите формати и изрази надеж дека наскоро ќе биде потпишан новиот руско-ирански меѓудржавен договор.
На одвоена средба со неговиот венецуелски колега, Путин го повика Николас Мадуро да развие финансиски и банкарски врски меѓу двете земји врз основа на националните валути.
Рускиот претседател ја пофали Венецуела како „еден од долгорочните доверливи партнери на Русија во Латинска Америка и во светот како целина“, истакнувајќи дека стратешките партнерски односи меѓу нивните земји продолжуваат да се зајакнуваат.
„Заемно корисна соработка се развива во сите правци. Расте и обемот на билатералната трговија, а се реализираат бројни проекти во енергетскиот сектор, фармацевтската индустрија, транспортот, во областа на новите технологии“, нагласи Путин.
Мадуро рече дека неговата нација го следи патот БРИКС и бара рамнотежа во светот.
Тој го најави меѓувладиниот состанок на Русија и Венецуела за 7 ноември, нагласувајќи дека очекува разговорите да придонесат за постигнување „успех во сите области на соработка“.
Свет
Лукашенко за наводите за севернокорејски војници во Русија: „Toa е глупост“
Белорускиот претседател даде интервју за „Би-Би-Си“ на маргините на самитот на БРИКС, кој се одржува во Казан, Русија.
Тој одговори на тврдењата дека илјадници севернокорејски војници пристигнуваат во Русија за да и помогнат на руската армија во војната против Украина.
„Глупости“, одговори Лукашенко.
„Познавајќи го неговиот карактер, Путин никогаш не би се обидел да убеди друга земја да ја вклучи својата војска во руската специјална операција во Украина“, додава тој.
„Тоа би било чекор кон ескалација на конфликтот доколку вооружените сили на која било земја, па дури и на Белорусија, се најдат во конфликтот“, одговори Александар Лукашенко.
„Дури и да се приклучиме на војната, тоа би било пат кон ескалација. Зошто? Затоа што вие, англосаксонците, веднаш би рекле дека друга земја интервенирала на едната страна… и војниците на НАТО ќе бидат распоредени во Украина“, вели Лукашенко.
Новинарот го праша дали Владимир Путин некогаш побарал од Лукашенка да обезбеди белоруски војници за војната на Кремљ во Украина.
„Никогаш. Ниту тој, ниту поранешниот министер за одбрана Сергеј Шојгу, ниту сегашниот министер за одбрана Андреј Белоусов никогаш не го поставиле тоа прашање“, вели Лукашенко.
Сепак, Лукашенко потврди дека нема ништо против Русија да користи белоруска територија при инвазијата на Украина (инвазијата ја нарекува специјална операција), при повлекување или префрлање на руските сили.
Тој рече дека Путин никогаш нема да употреби тактичко нуклеарно оружје, особено не од територијата на Белорусија.
Свет
Се зголемува бројот на убиени и повредени во терористичкиот напад во Турција
Бројот на убиени во денешниот терористички напад во Анкара се искачи на пет лица, соопшти турскиот министер за внатрешни работи.
Уште 22 лица се повредени, а двајца се во критична состојба, изјави Али Јерликаја.
Повторувајќи го мислењето на неговиот колега член на владата Јасар Ѓулер, министерот Јерликаја рече дека сторителите зад денешниот напад најверојатно се членови на курдската милитантна терористичка група ПКК.
Сепак, се чека потврда бидејќи властите сакаат да ги идентификуваат напаѓачите.
Ниту една група не презеде одговорност за нападот.