Европа
Донел 50 мажи да ја силуваат неговата онесвестена сопруга, снимките се пуштаа јавно во судот во Франција

„Ненадејна тишина завладеа во судницата во Авињон додека три големи телевизиски екрани поставени високо на три ѕида накратко затреперија додека се вклучуваа. Можеше да се почувствува дека луѓето се подготвуваат за нешто болно. Дојде време да се прикажат повнимателно избраните снимки од Доминик Пелико, кому му се суди затоа што со години ја дрогирал сопругата и потоа довел десетици мажи да ја силуваат“, јавува Би-би-си.
Видеата, снимени од Пелико и складирани на хард диск што тој го означи со зборот „злоупотреба“, ги документираат нападите врз неговата поранешна сопруга Жизел во текот на една деценија. Педесет мажи се обвинети дека ја силувале откако сопругот ја дрогирал и ја оставил во несвест во брачниот кревет.
Жизел Пелико, која сега има 72 години, се откажа од својата анонимност за да ѝ бидат откриени на француската јавност целосните детали за тоа на што била изложена. Нејзините адвокати се бореа да бидат прикажани видеата од злосторството на суд.
Иако судијата претходно изјави дека на луѓето со „чувствителен карактер“ ќе им биде дозволено да си заминат, една од адвокатите од адвокатскиот тим на Жизел Пелико, рече дека многумина избрале „да го погледнат силувањето право во очи“. Многу од мажите кои нејзиниот поранешен сопруг ги регрутирал на интернет, инсистираат на тоа дека не верувале дека тоа што го прават е силување.
На денот кога се пуштаа снимките во судницата, Доминик Пелико седеше зад стаклената плоча, со левата рака подигната за да му го блокира погледот на екранот. Жизел Пелико седеше на спротивната страна, со главата потпрена на ѕидот, со очите повремено затворени. Нејзиниот израз беше празен.
На екранот, во целосна тишина, можеше да се види низок, блед човек во само сини гаќи и црни чорапи како се приближува до креветот. Камерата се тресеше додека го следеше. Зад мажот, од левата страна, речиси гола, на стуткан бел чаршаф лежеше жена. И тогаш, без никакви промени на снимката, без никакво замаглување, започнаа сексуалните дејствија.
На видеото можеше јасно да се слушне како жената на моменти ‘рчи. Доминик Пелико ги стави двете раце на ушите. Тој со години додавал лек против анксиозност во храната и пијалокот на жената, поради што таа останала без свест, а лекот сериозно влијаел и на нејзиното здравје.
Обвинителите тврдат дека сите 50 мажи кои ги прифатиле онлајн поканите на Пелико да ја посетат семејната куќа во селото Мазан, во близина на Авињон, сигурно знаеле дека неговата сопруга е во несвест. Затоа, тие мораа да сфатат дека таа не е согласен партнер во некаква сексуална игра во која само се преправаше дека спие. Затоа сигурно имале намера да ја силуваат, стои во аргументот на обвинителот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Русија очекува да се договори за датум за третата рунда мировни преговори со Украина

Русија очекува да се договори за датум за третата рунда мировни преговори со Украина следната недела, изјави портпаролот на Кремљ, Дмитриј Песков.
Функционерот на Кремљ, Владимир Медински, кој ја предводи руската делегација, е во контакт со својот украински колега, изјави Песков.
Обновувајќи ги разговорите по повеќе од три години, двете страни се сретнаа лице в лице во Истанбул на 16 мај и на 2 јуни, што доведе до серија размени на затвореници и враќање на телата на загинатите војници.
Сепак, не е постигнат никаков напредок кон прекин на огнот за кој Украина се залага со поддршка од Западот. Русија вели дека сака конечно решение, а не само пауза во борбите, и инсистира на територијални и други барања за кои Украина вели дека би значеле капитулација.
Конфликтот се интензивира во последните неколку недели, при што Русија изврши некои од своите најтешки воздушни напади во војната, а Украина користеше беспилотни летала за да ги изненади воздушните бази и ѝ нанесе голема штета на руската флота бомбардери способни да носат нуклеарно оружје.
Европа
(Видео) Пропалестински активисти упаднаа во британска база, велат дека оштетиле два авиона

Пропалестински активисти упаднаа во воздухопловната база „РАФ Бриз Нортон“ и испрскаа два воени авиони со црвена боја. Снимките објавени на веб-страницата на „Палестинската акција“ покажуваат две лица во воздухопловната база во Оксфордшир.
Едно од лицата вози скутер до танкер за полнење гориво во воздух „ербас војаџер“ и се чини дека прска боја во неговиот млазен мотор. „Палестинската акција“ соопшти дека авионите за полнење гориво биле исклучени од употреба, а активистите успеале да ги избегнат обезбедувањето и апсењето.
BREAKING: Palestine Action break into RAF Brize Norton and damage two military aircrafts.
Flights depart daily from the base to RAF Akrotiri in Cyprus.
From Cyprus, British planes collect intelligence, refuel fighter jets and transport weapons to commit genocide in Gaza. pic.twitter.com/zzmFqGKW8N
— Palestine Action (@Pal_action) June 20, 2025
Британското Министерство за одбрана остро го осуди „вандализмот врз имотот на Кралските воздухопловни сили“ и изјави дека тесно соработува со полицијата, која го истражува инцидентот.
„Палестинската акција“ е вклучена во слични активности уште од почетокот на војната во Газа, а нејзините акции првенствено се насочени кон компаниите за оружје. Во мај групата ја презеде одговорноста за боењето на американски воен авион во Ирска со спреј.
Европа
(Видео) Украина: Руските напади со дронови врз станбени згради предизвикаа огромни пожари

Едно лице загина, а најмалку 14 други беа повредени кога руски беспилотни летала го нападнаа украинскиот град на Црното Море, Одеса, во текот на ноќта оштетувајќи високи згради и железничка инфраструктура, соопштија денеска локалните власти и обвинителите. Одеса, најголемото црноморско пристаниште во Украина, клучен центар за увоз и извоз, е под постојани руски ракетни и беспилотни напади од почетокот на војната.
„И покрај активната воздушна одбрана, оштетена е цивилна инфраструктура, вклучувајќи станбени згради, универзитет, гасовод и приватни автомобили“, изјави локалниот гувернер Олех Кипер на „Телеграм“. Кипер објави фотографии од запалени куќи и високи згради.
🔴 One killed and 14 injured, including 3 rescuers, in overnight Russian attack on Odesa. pic.twitter.com/Xe0JOL5yE4
— UNITED24 Media (@United24media) June 20, 2025
Локалните служби за итни случаи соопштија дека имало најмалку 10 напади со беспилотни летала врз станбени згради предизвикувајќи огромни пожари. Украинските воздухопловни сили денес соопштија дека Русија лансирала 86 беспилотни летала во Украина во текот на ноќта.
Војската соопшти дека нејзините сили за воздушна одбрана собориле 34 беспилотни летала, а 36 беспилотни летала биле изгубени, што укажува дека украинската војска ги пренасочила користејќи електронско војување или дека станува збор за симулатори на беспилотни летала што не носеле бојни глави.
Војската објави дека беспилотните летала погодиле осум локации. Украинската државна железничка компанија „Укрзализниција“ објави дека железничката станица во Одеса била оштетена за време на нападот, со оштетени далноводи и пруги. Неколку приватни и повеќекатни куќи биле оштетени во напад со беспилотни летала во Харков, североисточна Украина, во текот на ноќта, соопштија властите на Харков.