Француските власти размислуваат за тринеделно затворање на Париз со цел да се потисне ширењето на коронавирусот.

Првиот заменик-градоначалник на Париз, Емануел Грегоар, објави дека до француската влада ќе достави план со кој се пропишува превентивно тринеделно затворање на главниот град, со цел подоцна да се создадат услови за повторно отворање на сите места, вклучително и барови, ресторани и театри.

Како и во остатокот од земјата, во Париз е во сила ноќен полициски час од 15 декември, а рестораните и културните институции, како и на други места во Франција, се затворени со недели за да се спречи ширењето на инфекцијата.

Францускиот премиер Жан Кастекс претходно изјави дека владата ќе воведе мерки, вклучително и затворање за време на викендот во Париз и уште 19 други региони од почетокот на март, доколку епидемијата со коронавирусот продолжи да се шири.

Во интервју за „Франкфуртер алгемајне цајтунг“, германската канцеларка Ангела Меркел призна дека луѓето ја одбиваат вакцината на „Астразенека“ затоа што се загрижени за ефективноста и безбедноста на вакцината, што пак е последица на лошиот публицитет.

„Има проблем со прифаќањето на вакцината на ‘Астразенека’. Тоа е сигурна вакцина, безбедна и ефикасна. Одобрена од ЕМА, а во Германија се препорачува за лица под 65 години. Сите релевантни органи ни велат дека ова е вакцина на која можеме да и веруваме. Во време кога нема доволно вакцини, не можеме да избереме со што ќе се вакцинираме“, рече Меркел во едно интервју.

На прашањето дали самата ќе биде вакцинирана со „АстраЗенека“, Меркел одговори: „Имам 66 години и не спаѓам во групата на која и беше препорачано да се вакцинира со ‘Астразенека’“.

Германската полиција утрово изврши неколку претреси и уапси осум лица поврзани со крајно десничарска мрежа осомничена за трговија со дрога и перење пари.

Повеќе од 500 полицајци, вклучително и припадници на специјални единици, извршиле претрес во 27 станови и продавници во повеќе германски држави, јавува германската агенција ДПА.

Уапсените се на возраст меѓу 24 и 55 години, соопшти полицијата, додавајќи дека сè уште трагаат по докази како што се луксузни автомобили.

Осомничените се поврзани со две различни неонацистички групи кои наводно се одговорни за трговија со дрога, а исто така се вклучени во нелегална трговија со оружје.