Пожарот, кој гори во близина на градовите Риверсајд и Сан Бернардино во Калифорнија, зафати најмалку 20.516 хектари. Само пет проценти од пожарот се ставени под контрола, соопштија од тимот за управување со инциденти.

Според Си-ен-ен, неколку фактори им отежнуваат на пожарникарите да се борат со пожарот, што избувна во петокот. Најзначајниот од нив е структурата на теренот, изјави портпаролката на противпожарната служба на Националната шума во Сан Бернардино, Лиза Кокс.

„Имаме исклучително стрмен, нерамномерен терен“, рече Кокс.

Повеќе од 7.000 луѓе се евакуирани поради пожарот кој избувна во петокот. Причината за пожарот сè уште се истражува.

Светската здравствена организација соопшти дека тимот што го истражува потеклото на пандемијата на коронавирус ја завршил својата мисија во Кина и дека се подготвува да распореди поголема група експерти во областа од којашто се прошири епидемијата.

Генералниот директор на СЗО, Тедрос Аданом Гебрејесус рече дека меѓународен тим ќе биде испратен во кинескиот град Вухан, од каде започна пандемијата кон крајот на минатата година.

Тој додаде дека „доказите и хипотезите“ кои ќе произлезат ќе бидат темел за понатамошните истражувања.

„Епидемиолошките проучувања ќе започнат во Вухан, за да се утврди можниот извор на инфекција кај првите случаи“, вели тој.

Се претпоставува дека заразата со коронавирус потекнува од пазарите во кинескиот град Вухан кадешто се продаваат најразлични животни. Научниците се обидуваат да го утврдат потеклото на вирусот и како тој можел да премине од животните на луѓето. Тие ја отфрлаат шпекулацијата дека вирусот е произведен во лабораторија на Институтот за вирологија во Вухан.

Во светот од заразата со коронавирус се погодени повеќе од 18,3 милиони луѓе, од кои починаа повеќе од 695 илјади.

Британската влада донесе одлука да покрене акција наречена ‘Јади во ресторан, помогни му на ресторанот’ и да субвенционира оброци со 50 проценти. Акцијата ќе се реализира во август, секој понеделник, вторник и среда, кога е помал бројот на посети на ресторани.

Целта на акцијата е да им помогне на угостителите кои се борат со последиците од пандемијата на коронавирус. Во акцијата ќе бидат вклучени околу 72 илјади угостителски објекти.

Критичарите предупредуваат дека рестораните за брза храна треба да бидат исклучени од таа државна интервенција.