Пакистанските талибанци ја презедоа одговорноста за вооружениот напад во кој загинаа тројца полицајци на северот на земјата.

Тоа е втор напад извршен од групата само неколку дена откако објави прекин на примирјето со владата, објави Ројтерс.

Полицијата која патролирала во Ношера, во областа на провинцијата Хајбер Пахтунхва, која граничи со Авганистан, била нападната вечерва, изјави претходно за британската агенција заменикот на регионалната полиција Мохамад Али Гандапур.

Тој рече дека на лице место биле убиени тројца полицајци и дека идентитетот на напаѓачот не е познат.

Екстремистичката група Техрик-е-Талибан Пакистан (ТТП) ја презеде одговорноста за нападот.

ТТП во понеделникот објави дека го прекинува повеќемесечниот прекин на огнот, преземајќи ја одговорноста за самоубиствениот напад во јужен Пакистан во Кета два дена подоцна, во кој загинаа четири лица, а повеќе од 30 беа ранети.

ТТП сака да ја собори пакистанската влада и да ја замени со систем на управување што се согласува со нивното строго толкување на исламскиот закон.

Шпанската полиција соопшти дека шест писма-бомби кои пристигнале на адреси на високи функционери и институции биле испратени од градот Ваљадолид, пренесоа шпанските медиуми.

Овие писма биле испратени во периодот од 24 ноември до 2 декември на адресите на премиерот Педро Санчез, на украинската амбасада во Мадрид, на канцелариите на шпанската влада, на седиштето на агенцијата за комуникации на ЕУ и на американската амбасада, објави Ројтерс.

Повеќето од експлозивните писма се деактивирани, освен вработен во украинското дипломатско претставништво во Мадрид, кој беше полесно повреден кога експлозивното полнење делумно се активирало и се запалило.

Речиси 20 отсто од децата мигранти без придружба од Албанија, кои годинава ги прифати Советот на округот Кент во Англија, се исчезнати, пишуваат медиумите.

До 31 октомври, локалните власти примија 197 албански деца, од кои 39 исчезнале.

„Еcpat UK“, која води кампањи за заштита на децата од експлоатација, посочи дека бројките се многу загрижувачки.

Советот тврди дека тесно соработувал со Министерството за внатрешни работи и со полицијата за заштита на загрозените деца. Институцијатa уверува дека се грижела за 197 албански деца кои биле во прифатната единица на Министерството за внатрешни работи во Кент во периодот од 1 јануари до 31 октомври.

Од Советот додаваат дека од 7 ноември, 39 се пријавени како исчезнати, но и дека оттогаш некои деца наполниле 18 години. Според владините бројки собрани од „Би-Би-Си“, 44.122 луѓе го преминале Ламанш со мали чамци досега оваа година, во споредба со 28.461 кои пристигнале во 2021 година.

Ова предизвика центарот Манстон во Кент да биде преоптоварен.

Советот на округот Кент во соопштението нагласи дека има значително зголемување на бројот на албански деца без придружба и дека тие се ранливи на експлоатација.

Советот, исто така, најави дека ќе утврди дали системот може да се подобри за да се спречи истото да се повтори во иднина.