Европа
Европската комисија одобри нова вакцина против Ковид-19

Европската комисија денеска го одобри договорот со фармацевтската компанија „Валнева“ за набавка на речиси 27 милиони дози од вакцината против Ковид-19 во текот на 2022 година.
„Валнева“ е осма компанија со која Комисијата склучи договор за набавка на вакцини против Ковид-19. Претходно беа потпишани договори со „Астра зенека“, „Санофи-ГСК“, „Јансен фармасетика НВ“, „Бионтек-Фајзер“, „Кјурвак“, „Модерна“ и со „Новавакс“.
Договорот со „Валнева“ им овозможува на земјите членки да купат речиси 27 милиони дози вакцина во 2022 година. Според договорот, вакцината може да се приспособи на нови варијанти на вирусот, а земјите членки може да нарачаат до 33 милиони дополнителни дози во 2023 година.
„Договорот овозможува вакцината да се приспособи на нови варијанти. Нашето широко портфолио на вакцини ќе ни помогне во борбата против Ковид-19 и неговите варијанти во Европа и пошироко. Пандемијата сè уште не е надмината. Секој што може нека се вакцинира“, изјави претседателката на Комисијата, Урсула фон дер Лаен.
„Штом Европската агенција за лекови ќе прогласи дека е безбедна и ефикасна, вакцината на ‘Валнева’ ќе биде уште една опција во нашето широко портфолио на вакцини“, рече комесарката за здравство, Стела Киријакидес.
„Валнева“ е европска биотехнолошка компанија која развива вакцина со инактивиран вирус, кој се добива со хемиска инактивација на жив вирус. Станува збор за традиционална технологија за вакцини, која се користи веќе 60-70 години, се базира на примена на воспоставени методи и е многу безбедна. Се користи во производството на повеќето вакцини против грип и многу вакцини за деца. Во моментот таа е единствената вакцина со инактивиран вирус против Ковид-19 која е во фаза на клинички испитувања во Европа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Што навистина мислеше кралицата за брегзитот: „Подобро е да се држиш до ѓаволот што го познаваш“

Покојната кралица Елизабета II имаше мислења за различни теми, но таа обично не ги изразуваше јавно, оставајќи простор за шпекулации. Во својата нова книга „Power and the Palace“, поранешен новинар на „Тајмс“, Валентин Лоу, ја открива приватната страна на кралицата и нејзините ставови, разговарајќи со дворјани, политичари и државни службеници.
Кралицата ги сподели своите ставови во една прилика, само за да ги види на насловната страница на „Сан“ неколку години подоцна. За време на кампањата за референдум за тоа дали Велика Британија треба да ја напушти Европската унија, весникот објави сторија со наслов „Кралицата го поддржува Брегзит“. Во статијата се вели дека на ручек во Виндзор во 2011 година, кралицата му рекла на вицепремиерот Ник Клег дека мисли дека ЕУ оди во погрешна насока. Таа наводно рекла: „Не ја разбирам Европа“.
Дали кралицата навистина беше поддржувач на Брегзит? Иако Бакингемската палата не беше воодушевена од извештајот на „Сан“, не ја негираше приказната. За ова имаше добра причина: се сметаше дека официјалното негирање дека кралицата го поддржува Брегзит би имплицирало дека таа го поддржува останувањето во ЕУ. Кралицата, се разбира, не може да гласа бидејќи е над политиката.
Години по тој наслов, се појавија докази за тоа што навистина мислела кралицата за Брегзит. Еден министер кој разговарал со неа во пролетта 2016 година, три месеци пред референдумот, се сетил дека Елизабета II рекла: „Не треба да ја напуштиме ЕУ, подобро е да се држиш до ѓаволот кој го познаваш“.
Иако читала статии во весниците за бирократијата во Брисел и велела: „Ова е смешно“, таа сè уште ја гледала ЕУ како дел од поредокот што го одбележал периодот на соработка по двете светски војни.
Како што рече поранешниот премиер Дејвид Камерон:
„Таа беше толку внимателна никогаш да не изрази политички став, но секогаш се добиваше чувство дека, како и повеќето нејзини поданици, таа сметаше дека европската соработка е неопходна и важна, но дека институциите на ЕУ понекогаш можат да бидат фрустрирачки.“
Веста за ставовите на кралицата за Брегзит стигна до Камерон, кој мораше веднаш да одлучи дали да ја користи во кампањата за останување. Тој одлучи да не го стори тоа, иако таборот за излегување немаше такви скрупули. Но, сега е јасно: ако кралицата имаше право на глас, таа ќе гласаше за останување.
фото: принтскрин
Европа
Зеленски: Крајот на војната во Украина е веројатен според едно сценарио, но тоа нам не ни одговара

Украинскиот претседател Володимир Зеленски денес изјави дека крајот на војната во таа земја е можен според „корејското сценарио“, но дека тоа не ѝ одговара на Украина од гледна точка на безбедносните гаранции.
„Јужна Кореја е пример за триумф на вредностите. Нејзиниот развој не е соодветен на развојот на Северна Кореја, каде што имаше вистински економски и цивилизациски пад. Јужна Кореја направи скок напред во цивилизациски, технолошки и економски поглед бидејќи негува хуманизам“, тврди Зеленски.
Според него, крајот на војната според „корејското сценарио“ е веројатен за Украина, но заканата од Северна Кореја е непропорционална на руската, а нивото на безбедносни гаранции за Јужна Кореја е многу повисоко, пренесува Укринформ.
„Сè е можно, но мора да се каже дека Јужна Кореја има голем сојузник – Соединетите Американски Држави. И, верувајте ми, тие имаат многу системи за воздушна одбрана кои ја гарантираат нивната безбедност“, рече Зеленски.
Тој истакна дека Украина се стреми да добие сигурни безбедносни гаранции, како што се системите „Патриот“ што ги има Јужна Кореја, истакнувајќи дека руската закана за Украина е до десет пати поголема од севернокорејската закана за Јужна Кореја.
„Идентична репродукција на јужнокорејскиот модел веројатно нема да ѝ одговара на Украина од безбедносна гледна точка“, рече Зеленски, додавајќи дека го почитува економскиот модел на земјата.
фото: принтскрин
Европа
Захарова: Странска војска во Украина е неприфатлива, нема да разговараме за тоа

Русија не планира да разговара за распоредување на странски трупи во Украина во кој било формат и го смета за неприфатливо, изјави портпаролката на руското Министерство за надворешни работи, Марија Захарова, за новинарите.
Нејзиниот коментар дојде откако претседателката на Европската комисија, Урсула фон дер Лајен, изјави дека ќе испрати европски трупи во Украина, идеја што исто така ја отфрли Германија.
Во интервју за „Фајненшл тајмс“ во неделата, фон дер Лајен рече дека Европа изработува „прилично прецизни планови“ за распоредување на мултинационални сили во Украина како дел од повоените безбедносни гаранции што би биле поддржани и од САД.
„Русија нема да разговара за странска интервенција во Украина во кој било формат, што е фундаментално неприфатливо и ги поткопува сите форми на безбедност“, рече Захарова.
фото: принтскрин