Од земјите во регионот, во Србија се потврдени најголем број случаи на коронавирус, додека во Црна Гора најмалку.

Бројот на заболени од коронавирус во Србија се искачи на 2.867. Во последните 24 часа потврдени се 201 нов случај од 2.867 тестирани. Од вирусот регистрирани се 66 смртни случаи, а околу 75.000 луѓе се во самоизолација. Просечната возраст на починатите е 64, 6 години.

До 8 април се тестирани 12.374 луѓе. Најголем број заболени има во Белград. Во Србија хоспитализирани се 1.891 пациент.

Во Хрватска за 24 часа се потврдени 64 нови заразени, 40 лица оздравеле, а едно лице починало од коронавирус. Вкупниот број на потврдени случаи е 1.407. Вкупно се направени 13.680 тестови, а во последните 24 часа 555.

Последната жртва е повозрасен маж кој имал други болести. Во Хрватска починаа вкупно 20 луѓе од Ковид-19. Вкупно закрепнале 219 луѓе. Хопитализирани се 326 пациенти.

Во Црна Гора во последните 24 часа се регистрирани три нови случаи, со што вкупниот број се искачи на 252.

Во Босна и Херцеговина се регистрирани 842 случаи на Ковид-19, а бројот на починати е 35.

Во Словенија потврдени се 1.091 случај, 40 смртни случаи, а тестирани се 29.455 луѓе.

Во Албанија се регистрирани 17 нови случаи, а вкупниот број на заболени достигна 400. Починале 22 лица, а излекувани се 154.

Во Бугарија во последните 24 часа се регистрирани 30 нови случаи на заболени од Ковид-19, а вкупниот број е 611. Излекувани се 48 лица, а починале 24 пациенти. Просечната возраст на починатите е 62 години.

Холанѓанка на возраст од 107 години заздрави од коронавирусот и најверојатно ќе стане најстарата личност во светот која ја пребродила болеста.

Корнелија Рас се разболела на 17 март, ден по нејзиниот 107. роденден, објави холандскиот весник АД, откако била на миса со свои пријатели од старскиот дом во Горе-Оверфлке, остров во југозападниот дел на земјата.

Таа со 40 други лица од домот кои присуствувале на мисата била тестирана како позитивна на вирусот.

Во меѓувреме, дванаесет лица од таа група починале, но лекарите на госпоѓа Рас во понеделникот и соопштиле дека таа ја пребродила болеста.

„Не очекувавме дека ова ќе го преживее“, изјавила нејзината внука Маике де Грут.

„Таа не користи лекови, сè уште се движи, а секоја вечер клекнува и му благодари на Господ за долговечноста. Како што стојат работите, се чини дека и натаму ќе може да го прави тоа”, рекла внуката.

Пред Корнелија Рас, најстариот документиран преживеан пациент од коронавирус беше 104-годишниот Американец Бил Лапшис.

Холандија денека потврди уште 148 смртни случаи од коронавирус, со што сега бројката изнесува вкупно 2.396. Заразени се околу 21.000 луѓе.

Здруженијата што претставуваат проститутки во Франција побараа од владата на претседателот Емануел Макрон да им исплати парични средства на сексуалните работници поради влијанието на коронавирусот врз нивната егзистенција, пренесува „Ле Фигаро“.

Федерацијата на Црвените чадори, здружение кое тесно соработува со проститутките и сексуалните работници, го повика претседателот Макрон да размисли за финансиска помош за сексуалните работници, велејќи: „Мора да се создаде фонд за итни случаи за да се обезбедат приходи за време на строгиот режим на движење“.

Групата смета дека финансиската помош од државата ќе биде единственото решение за да се спречи преземањето ризик поврзан со вршење сексуална работа и додаде дека прашањето е „прашање на јавното здравје“.

За разлика од другите професии, проститутките и сексуалните работници не се квалификувани за 1.500 евра државна помош што им се нуди на самовработените лица.

„На краток рок, некои од најсиромашните сексуални работници ќе бидат принудени да ризикуваат затвор, не од задоволство, туку поради недостиг од средства за егзистенција затоа што станува збор за опстанок“, велат од фондацијата.

Во 2016 година Франција донесе закони за проституција со кои им се стави крај на паричните и затворските казни за проститутки кои нудат секс, но донесе казни до 1.500 евра за клиентите кои плаќаат за секс и го повторуваат прекршокот, при што висината на казните е до 3.750 евра.

Додека многу проститутки се борат за опстанок поради строгиот режим на движење, дилерите на наркотици и другите организирани криминалци ги искористија строгите мерки со префрлање на други шеми како измама и продажба на фалсификувани медицински материјали, посочува Европол.

Криминалот во некои области продолжи во Франција и покрај строгите мерки на движење, вклучително и напади врз полицајци во некои проблематични предградија во делови од земјата.

Само во текот на минатиот викенд полицијата беше нападната во повеќе градови и општини низ целата земја, а во инцидент во Бордо, врз полицајците бил фрлен фрижидер од балконот на една зграда.