Помошникот на Кремљ, Јуриј Ушаков, го оцени европскиот контрапредлог на американскиот мировен план за Украина како „целосно неконструктивен“.

„На прв поглед, европското дополнување изгледа целосно неконструктивно и не е прифатливо за Русија“, изјави Ушаков.

Тој додаде дека многу точки од првичниот американски план, испратен до Киев минатата недела, се прифатливи, но дека други бараат детална дискусија.

Ушаков изјави дека постојат „некои сигнали“ за организирање средба меѓу руски и американски претставници, но дека конечен договор сè уште нема.

Европските лидери претходно ја изразија загриженоста околу американскиот план од 28 точки, особено поради идејата дека Украина треба да прифати територијални отстапки и намалување на вооружените сили, поради што изготвија свој контрапредлог. По вчерашните разговори во Женева, САД и Украина соопштија дека составиле „ажуриран и доработен мировен рамковен документ“.

Украинскиот претседател Володимир Зеленски и американскиот претседател Доналд Трамп би можеле да се сретнат во Белата куќа уште оваа недела за да разговараат за новиот мировен план, тврдат извори запознаени со преговорите. Киев значително го изменил американскиот предлог, отстранувајќи дел од максималистичките барања на Русија.

Првичниот американско-руски план од 28 точки, составен минатиот месец од специјалниот пратеник на Владимир Путин Кирил Дмитриев и претставникот на Трамп, Стив Виткоф, од Украина барал повлекување од градови под контрола на Киев во Донбас, ограничување на војската и откажување од членството во НАТО.

По неделните преговори во Швајцарија меѓу американскиот државен секретар Марко Рубио и шефот на кабинетот на Зеленски, Андриј Јермак, планот бил драстично ревидиран – новата верзија има 19 точки. Киев и европските партнери инсистираат линијата на фронтот да биде почетна основа за територијалните разговори.

Рускиот претседател Владимир Путин и неговиот турски колега Реџеп Таип Ердоган денес телефонски разговараа за решавање на конфликтот во Украина, со посебен акцент на американските мировни предлози, но и за билатералните односи меѓу двете земји, пишува руската агенција РИА Новости.

„Беа разменети мислења за ситуацијата околу Украина, вклучително и во контекст на американските предлози за мирно решение“, кратко соопшти Кремљ. Во разговорот, Путин нагласи дека американските предлози, во верзијата што ја доби Москва, го следат правецот на разговорите со американскиот лидер Доналд Трамп одржани во Алјаска на 15 август. Според него, тој план во принцип може да послужи како основа за конечно мирно решение.

Ердоган, од своја страна, ја потврди намерата на Турција да придонесе во процесот на преговори и го понуди Истанбул како платформа за идните разговори. Двајцата лидери се согласија да ги интензивираат руско-турските контакти за мировниот процес на различни нивоа. Турскиот лидер му ги пренесе и на Путин своите впечатоци од самитот на Г20 во Јоханесбург. Како дел од разговорите за билатералните односи, беше потврден интересот за проширување на трговските и инвестициските врски и спроведување на заеднички проекти во енергетскиот сектор.

Минатата недела, американската администрација објави дека работи на мировна иницијатива за решавање на ситуацијата во Украина.

Како што изјави Путин, Москва го има текстот на американскиот план, но за него сè уште не е конкретно дискутирано. Путин рече дека документот може да послужи како основа за конечно решение.

Еден ден претходно, во Женева се одржаа преговори меѓу претставници на ЕУ, САД и Киев, каде што се разговараше за промените направени од европската и украинската страна на американскиот предлог.

Фото: принтскрин