Во последните 24 часа во Словенија се потврдени 137 нови случаи на инфекција со коронавирус со направени 3.557 тестови, што е за 33 повеќе од претходниот ден и е нов рекорден број на потврдени дневни инфекции од почетокот на епидемијата, објави словенечката влада.

Поради големиот пораст на бројот на новоинфицирани во последните две недели, Словенија беше ставена на списокот на епидемиолошки небезбедни дестинации од страна на британската влада, откако тоа го направија Норвешка, Шведска, Литванија и Естонија претходните денови, објавија словенечките медиуми.

Бројот на активни случаи на инфекција во Словенија во моментов е 1116, од вкупно 4195 потврдени инфекции регистрирани од почетокот на епидемијата, објави словенечкото Министерство за здравство.

Во болниците има 67 пациенти со Ковид-19, што е за седум повеќе од претходниот ден, а 11 од нив се на интензивна нега. Беа забележани четири нови смртни случаи, а бројот на жртвите се искачи на 138.

Бидејќи следните десет дена се сметаат за клучни за смирување на епидемиолошката состојба, владата на Јанез Јанша ќе воведе задолжително носење маски на јавни простори како што се пазари, но и во училници и универзитетски сали.

Владата разгледува и можно ограничување на дозволеното дружење на луѓето на најмногу шест лица. Покрај тоа, од следната недела ќе се ограничи работата на гостилниците, клубовите и другите локали, па ќе им биде дозволено да работат до 22 часот, а предвидени се и некои ограничувања за работата на продавниците, објавија медиумите.

Од друга страна, владата го повикува населението да преземе одговорност и доследно да се придржува кон основните епидемиолошки мерки – одржување на потребното растојание, хигиена на рацете и избегнување приватни собири надвор од семејниот круг, како што се родендени и други прослави.

Директорот на американскиот ФБИ, Кристофер Реј, вели дека Русија не се откажува од намерата да влијае на резултатот од претседателските избори во САД во ноември. Според наодите на американските разузнавачки служби, главната цел на Москва е да и наштети на кампањата на демократскиот кандидат Џо Бајден и на она што се смета како антируски естаблишмент.

Реј зборуваше пред членовите на Комитетот за национална безбедност во Претставничкиот дом и опиша дека операциите на Кремљ се многу активни на социјалните мрежи, државната телевизија во Русија и на другите платформи.

Изјавата на директорот на ФБИ е во согласност со проценките што се појавија на почетокот на август, а беа објавени од највисокиот службеник за контраразузнавање во Америка, Вилијам Еванина.

Тој предупреди дека Русите сакаат да и помогнат на кампањата на Доналд Трамп, што директорот на ФБИ не го кажа експлицитно, и наместо тоа се фокусираше на дезинформациите што ги погодуваат американските гласачи.

„Она што најмногу ме загрижува е постојан обид за ширење дезинформации и чести мали сајбер напади. Загрижен сум дека ова ќе доведе до пад на довербата кај американските гласачи со текот на времето”, рече Реј.

Одговарајќи на прашања во Конгресот, Реј рече дека нема причина за грижа во врска со зголемениот број гласови што ќе пристигнат по пошта поради пандемијата.

„Досега не видовме координиран обид за измама на гласачите на изборите“, рече директорот на ФБИ.

Претседателот Трамп во серија твитови предупреди дека гласањето по пошта ќе заврши како „изборна кражба“ и ќе доведе до „масовен хаос и конфузија“.

Двајца турски војници загинаа, а друг е ранет откако курдските милитанти од ПКК истрелале ракети врз воена база во Северен Ирак што е дел од пограничната антитерористичка операција во Северен Ирак, соопшти турското Министерство за одбрана на Турција, пренесува „Араб њуз“.

„Двајца војници загинаа, уште еден е повреден во напад на терористите во операцијата „Канџа-тигар“ во Северен Ирак“, соопшти Министерството.

Турција редовно ги напаѓа милитантите на Курдската работничка партија (ПКК), како во нејзиниот главно курдски југоисток, така и во Северен Ирак, каде што групата е сместена. Во јуни, Анкара започна нова копнена офанзива, наречена Операција „Канџа-тигар“, со која турските трупи напредуваа подлабоко во Ирак.

Министерството за внатрешни соопшти дека 71 милитант на ПКК биле убиени од 13 јули во рамките на серијата операции во Турција, наречени „Молскавичнии операции“ и додаде дека 38 соработници биле заробени.

Турската операција „Канџа-тигар“ започна во средината на јуни со цел да се осигура безбедноста на турскиот народ и границите со неутрализирање на заканата која доаѓа од ПКК и од другите терористички групи во регионот.

Во својата повеќе 30 години долга кампања против Турција, ПКК, која се наоѓа на листата терористички организации на Турција, САД и ЕУ, е одговорна за смртта на околу 40.000 луѓе, меѓу кои и деца и жени.