Во Хрватска се потврдени два нови случаи на инфекција со коронавирус, со што вкупниот број заразени се искачи на петмина, соопшти министерот за здравство Вили Берош.

Новите два случаи се лица кои биле во контакт со првозаразениот, односно третозаразениот.

Од двајцата нови заболени, едниот е во Загреб, а другиот е во Риека и тие се хоспитализирани последниве неколку дена.

Според хрватски „Индекс“, едниот од нив бил хоспитализиран во Клиничкиот болнички центар Риека и тој е на средовечна возраст, а другиот е помлад пациент кој се наоѓа на Клиниката за инфективни болести во Загреб.

Раководителот на Клиниката за инфективни болести рече дека новозаразениот во Загреб веќе бил во карантин, поради тоа што се работи за личност блиска со првозаразениот во земјата.

Ист е случајот и со пациентот во Риека.

„Сите случаи во Загреб се поврзани со првозаразеното лице, а случајот во Риека е поврзан со првото заразено лице во Риека и сите веќе биле под надзор како мерка за претпазливост“, рече министерот за здравство.

Гркинка која неодамна се вратила дома од северна Италија стана четвртиот случај на коронавирус во Грција.

Нејзината состојба е стабилна и внимателно се следи, соопштија здравствените власти.

Станува збор за 36-годишна жена која е примена во болница во Атина, јавуваат грчките медиуми.

Албанија ризикува повторно да стане „европска Северна Кореја“, изјави албанскиот претседател Илир Мета.

Тој во интервју за „Еуроњуз“ ја обвини владата предводена од премиерот Еди Рама дека ја узурпира секоја независна институција и станала еднопартиски режим.

Албанскиот претседател тврди дека води битка за демократија и негира дека станува збор за лична борба за моќ со премиерот Рама.

„Како можам да се издигнам над партиската политика, кога имаме целосно заробување на државата од страна на владејачкото мнозинство во Албанија, кога тие контролираат сè“, рече Мета.

„Денес, за жал, живееме во еднопартиски режим, под закана да се вратиме 30 години назад кога бевме Северна Кореја во Европа“, рече Мета.

„Еуроњуз“ потсетува дека Мета повика на антивладини протести во Тирана на 2 март, додека Рама почна постапка за отповикување на претседателот во врска со обидот на Мета да ги откаже минатогодишните локални избори.