Премиерот на Унгарија, Виктор Орбан, ја прими вакцината против сезонски грип, а видеото и фотографијата од здравствениот дом ги објави на својата фејсбук-страница и ги повика своите сонародници да се вакцинираат.

„Само храбро. Секој кој може, нека прими вакцина против грип“, изјави Орбан покрај објавеното видео.

Експертите препорачуваат вакцинирање против грип, особено во ситуација на пандемија.

На крајот на август, унгарската влада објави дека, со оглед на ширењето на епидемијата на коронавирус, заштитната вакцина против грип ќе биде бесплатна во Унгарија.

Во Австрија бројот на новозаболени од коронавирус за првпат надмина 2.000.

Во изминатите 24 часа беа регистрирани 2.435 новозаболени лица, што е нов рекорд од почетокот на епидемијата во Австрија.

Исто така, рекорден број на новозаболени лица е забележан во Виена – 659.

Следува Горна Австрија со 471, потоа Долна Австрија со 403 и Тирол со 338.

Централниот германски епидемиолошки институт „Роберт Кох“ денеска ја оцени актуелната епидемиолошка состојба и рекордниот број на новозаразени во земјата од над 11.000, како многу сериозна.

„Во меѓувреме, ситуацијата стана многу сериозна“, рече директорот на институтот „Роберт Кох“, Лотар Вилер на прес-конференција, откако беше објавена бројката од 11.287 новозарзени во последните 24 часа. Тоа е најголемиот број на новоинфицирани за еден ден од почетокот на пандемијата.

Вилер сепак оцени дека е можно да се спречи уште посилно ширење на вирусот.

„Во моментов, сè уште имаме шанса да го забавиме понатамошното ширење на вирусот“, истакна тој. Според него, повеќето од новозаразените во овој есенски бран на пандемијата се поврзани со приватни прослави и собири.

„Насекаде каде има многу разговор и смеа на мал простор постои опасност од брзо ширење на инфекцијата“, рече Вилер.

Во исто време, можноста за инфекција во јавниот превоз и хотелите ја оцени како релативно ниска.

Директорот на епидемиолошкиот институт не гледа потреба да се менува сегашната стратегија за борба против ширењето на вирусот во Германија, која се заснова на хигиенски мерки, носење маски и одржување на растојание.