Кина ја повика Европската унија да биде „објективна и фер“ и внимателна со зборови и постапки во кинеско-филипинскиот спор во Јужното Кинеско Море, по изјавите на Унијата во врска со инцидентот викендов.

Кина е „многу незадоволна“ од „обвинувањата“ на Европската унија против неа по ова прашање, се вели во соопштението на кинеската мисија во ЕУ.

„Европската унија не е страна во прашањето за Јужното Кинеско Море и нема право да привлекува внимание на тоа“, се вели во соопштението.

Се наведува и дека постојаното нагласување на прашањето за слободата на пловидба од страна на ЕУ „не е од корист за интересите и меѓународниот кредибилитет на ЕУ“.

Кина и Филипините во саботата разменија обвинувања за намерно судирање на бродови на крајбрежната стража во спорните води на Јужното Кинеско Море, последно во серијата ескалација на конфликти.

Судирот во близина на Сабина Шол беше нивниот петти поморски судир во еден месец во долгогодишното ривалство околу важниот воден пат.

Европската унија во неделата соопшти дека ги осудува „опасните дејствија на бродовите на кинеската крајбрежна стража против законските филипински поморски операции“ во морето.

Службата за надворешна акција на Европската унија соопшти дека неодамнешните инциденти меѓу кинеските и филипинските власти „ја загрозуваат безбедноста на животот на море и го нарушуваат правото на слобода на пловидба и прелетување, на што имаат право сите нации според меѓународното право“.