Владата на Нов Зеланд најави дека ќе ја прошири обврската за вакцина против Ковид-19 на илјадници вработени што се во близок контакт со своите клиенти, вклучително и вработени во ресторани, барови, спортски сали и фризерски салони.

Промените значат дека речиси 40 отсто од сите работници на Нов Зеланд ќе мора да бидат целосно вакцинирани против коронавирусот или ризикуваат да ги загубат своите работни места во споредба со 15 отсто порано.

Во изјавата за новинарите премиерката Џасинда Ардерн рече дека не смета оти новите правила ги надминуваат овластувањата на владата.

„Ова барање значи дека персоналот и клиентите се третираат еднакво и тоа ќе игра голема улога во запирање на ширењето на вирусот во местата со најголем ризик намалувајќи го потенцијалот од тоа Ковид-19 да влезе воопшто на работното место“, рече Ардерн.

Наставниците и здравствените работници се меѓу работниците на кои претходно им било наредено да ја примат вакцината.

Соопштението на владата дојде само неколку дена откако Нов Зеланд постави цел – целосно да вакцинира 90 отсто од луѓето постари од 12 години, со цел да се прекине циклусот на строги карантински мерки.

Окленд, најголемиот град во земјата, е во изолација повеќе од два месеца по избувнувањето на делта-сојот на коронавирусот.