Британскиот премиер Борис Џонсон и турскиот претседател Реџеп Тајип Ердоган изразија желба да се сретнат со германските и француските лидери за да разговараат за воената операција на Турција во северна Сирија.

Кабинетот на Џонсон соопшти дека британскиот премиер и Ердоган „се согласиле да побараат можност да се сретнат со францускиот претседател Емануел Макрон и германската канцеларка Ангела Меркел за да разговараат за актуелната состојба, како и за миграцијата и борбата против тероризмот“.

Прекинот на огнот стапи на сила во четвртокот вечер за да можат Курдите да се повлечат од североисточна Сирија и треба да трае до вторник.

Турската војска денеска воспостави контрола над сирискиот пограничен град Рас ал-Ајин, пренесуваат медиумите.

Турските трупи и опозициските единици кои се борат против сириската армија влегоа во Рас ал-Ајин, откако единиците на коалицијата на Сириските демократски сили се повлекоа од градот.

Претходно, Демократските сили, формирани околу курдските вооружени групи, започнаа да се повлекуваат од Рас ај – Ајин, како што беше договорено со САД, пренесе „ТАСС“.

Анкара не се откажува од воспоставувањето „безбедносна зона“ во северните региони на Сирија, долж границата, каде бегалците од Турција би можеле да се вратат.

САД и Турција постигнаа договор да ја прекинат борбената операција на 17 октомври за период од 120 часа за да им се овозможи на курдските единици на Сириските демократски сили да имаат време да ја напуштат пограничната „безбедносна зона“.

Италијанските власти евакуираа 4.000 луѓе од центарот на северниот град Болцано поради деактивирање на авионска бомба од Втората светска војна.

Бомбата е деактивирана утрово за време на тричасовна операција, по што повторно е отворен центарот на градот, како и автопатот и железничката линија што ја поврзува Италија со Австрија и Германија.

Во Втората светска војна градот Болцано претрпел 13 бомбардирања, при што загинале 200 луѓе, а 60 отсто од градот бил оштетен.