Европската Унија е подготвена брзо да дејствува во трговските преговори со Соединетите Американски Држави, но ќе треба да „постигне добар договор“ до 9 јули, првичниот рок за преговори, изјави претседателката на Европската комисија, Урсула фон дер Лајен.

Фон дер Лајен во објава на Икс изјави дека имала „добар“ телефонски разговор со американскиот претседател Доналд Трамп. Повикот уследи откако Трамп во петокот изјави дека е незадоволен од темпото на трговските преговори со ЕУ и се закани со воведување царини од 50 проценти за сите стоки од Европската унија почнувајќи од 1 јуни.

На почетокот на април, самиот Трамп постави рок од 90 дена за трговски преговори со ЕУ, кој треба да истече на 9 јули.

„Добар разговор со претседателот на Соединетите Американски Држави“, напиша фон дер Лајен на Икс. „Европа е подготвена брзо и решително да ги забрза преговорите. За да преговараме за добар договор, ни треба време до 9 јули“, рече таа.

Најмалку 20 лица се убиени, а десетици се ранети по израелскиот напад врз училиште во кое се сместени раселени лица во Газа, изјавија локалните здравствени власти за Ројтерс рано утрово.

Лекарите рекоа дека меѓу десетици жртви во нападот врз училиштето, во населбата Дараџ во градот Газа, имало жени и деца.

Некои од телата биле тешко изгорени, според сликите што кружат на социјалните медиуми, кои Ројтерс не можеше веднаш да ги потврди.

Израелската војска не даде веднаш коментар.

Американскиот претседател Доналд Трамп изрази длабоко незадоволство од руското бомбардирање на Украина за време на викендот, велејќи дека не е задоволен од рускиот претседател Владимир Путин.

„Не знам што му е. Што по ѓаволите му се случи? Убива многу луѓе. Не сум среќен поради тоа“, им рече Трамп на новинарите на аеродромот во Мористаун, Њу Џерси, додека се подготвуваше да се врати во Вашингтон.

Трамп ги даде овие забелешки како одговор на руските воздушни напади врз украинските градови во текот на ноќта во неделата, вклучувајќи го и главниот град Киев.

Малку подоцна, Трамп го даде истиот коментар на неговата мрежа.

„Отсекогаш сум имал многу добри односи со Владимир Путин од Русија, но нешто му се случи. Тој полудел целосно! Убива толку многу луѓе непотребно, а не зборувам само за војници. Ракети и беспилотни летала се испукуваат врз градови во Украина без причина. Секогаш велев дека ја сака ЦЕЛА Украина, а не само дел од неа, и можеби ќе се докаже дека сум во право, но ако се обиде да го стори тоа, тоа ќе доведе до пропаст на Русија!

Исто така, претседателот Зеленски не ѝ прави никаква услуга на својата земја со начинот на кој зборува. Сè што излегува од неговата уста предизвикува проблеми, не ми се допаѓа, и подобро да престане.

Ова е војна што никогаш немаше да се случи ако јас бев претседател. Ова е војната на Зеленски, Путин и Бајден, а не на Трамп. Јас само помагам во гаснењето на големи и грди пожари што беа предизвикани поради голема некомпетентност и омраза.“

Руските сили испукаа 367 дронови и ракети кон украинските градови, вклучувајќи го и главниот град Киев, во текот на ноќта во неделата, во најголемиот воздушен напад досега во војната, при што загинаа најмалку 12 лица, а десетици беа ранети.

Трамп се обидува да ги натера двете страни да се согласат на прекин на огнот во тригодишната војна во Украина, а минатата недела разговараше повеќе од два часа со Путин.

Тој ја покрена можноста за воведување дополнителни санкции врз Русија како одговор на тековните напади.