Свет
Првпат во историјата ќе биде формирана израелска влада со поддршка од арапска партија
На заедничката цел за отстранување на Бенјамин Нетанјаху од позицијата најдолговечен израелски премиер, во средата се приклучи и Мансур Абас. Неговата мала исламска партија им дозволи на еврејските партии минимално мнозинство во Кнесетот.
Така, Раам стана првата партија на арапското малцинство во Израел, кое сочинува 21 процент од населението, која ќе ја поддржува израелската влада. Владата допрва треба да биде потврдена во парламентот, пренесува „Ројтерс“.
Абас на тој начин ги остави настрана несогласувањата со потенцијалниот иден премиер Нафтали Бенет, поранешен шеф на Организацијата за еврејско населување и поддржувач на анексијата на поголем дел од окупираниот Западен Брег, територии што Палестинците ги сакаат за својата идна држава.
Стоматолог по професија, 47-годишниот Абас рече дека се надева оти ќе ги подобри условите за живеење на арапските жители на Израел, кои се жалат на дискриминација и занемарување од страна на властите.
„Одлучивме да ѝ се приклучиме на владата за да ја промениме рамнотежата на политичките сили во земјата“, им рече тој на своите приврзаници по потпишувањето на договорот за коалиција со Бенет и опозицискиот лидер Јаир Лапид.
Партијата на Абас соопшти дека договорот вклучува повеќе од 16 милијарди американски долари за подобрување на инфраструктурата и борбата против криминалот во градовите со мнозинско арапско население.
Договорот вклучува и запирање на уништувањето на домовите изградени без дозволи во арапските села и доделување официјален статус на бедуинските градови во пустината Негев, упориште на исламистите.
„Зборувам јасно и искрено: бидејќи формирањето на оваа влада се заснова на нашата поддршка, ќе можеме да влијаеме на неа и да постигнеме големи работи за нашето арапско општество“, рече Абас кого дел од арапското население го обвинува за предавство поради поддршката на антипалестински политичари.
Израелскиот премиер Бенјамин Нетанјаху, пак, ги повика сите членови на парламентот избрани со десничарски гласови да се спротивстават на новата коалиција, чие формирање беше објавено доцна синоќа од мандатарот Јаир Лапид, лидерот на партијата на центарот, Јеш атид (Има иднина). Тој ја нарече новата влада опасна и левичарска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Киев е без греење на минусни температури, Зеленски бара поддршка за воздушна одбрана додека
Украинскиот претседател Володимир Зеленски побара од сојузниците поголема поддршка за воздушна одбрана, бидејќи стотици згради во Киев се без греење на нула температури втор ден по руските напади, јави АФП.
Русија ја погодува украинската енергетска инфраструктура цело време во текот на речиси четиригодишната војна, но Киев вели дека оваа зима била најтешка, со стотици руски беспилотни летала и ракети против украинската воздушна одбрана за време на големи мразови.
„Само оваа недела, Русите лансираа повеќе од 1.700 борбени беспилотни летала, над 1.380 водени воздушни бомби и 69 ракети од различни видови“, рече Зеленски претседателот по пристигнувањето во Вилнус.
„Затоа ракетите за системите за воздушна одбрана се потребни секој ден и ние продолжуваме да работиме со Соединетите Американски Држави и со Европа за да обезбедиме посилна заштита на нашето небо“, рече тој.
Руските бомбардирања особено го погодија Киев, принудувајќи половина милион луѓе да се евакуираат.
„Во моментов има 1.676 високи станбени згради во Киев без греење по непријателскиот напад врз градот Киев на 24 јануари“, рече градоначалникот на Киев, Виталиј Кличко.
Температурите под нулата и повторените воздушни напади ги забавија напорите на екипите кои работат да ги вратат греењето и струјата.
Свет
Куче открило дрога во вредност од 1,7 милиони евра
Со помош на кучето-душкач Мезкал на крајбрежната служба на Грција во камион што со траект од Италија пристигнал на пристаништето во грчкиот град Патра, биле откриени над 44 килограми кокаин и 134 килограми канабис во вредност од 1,7 милиони евра, за што уапсени се две лица.
Како што соопштија од крајбрежната служба на Грција, при контрола извршена од припадници на Регионалната единица за борба против дрога на пристаништето во Патра на товарно возило (со полуприколка) управувано од 49-годишен грчки државјанин и „по индикација од службеното куче за детекција на наркотични супстанции на Крајбрежната стража „Мезкал“, во кабината на возачот беа пронајдени внимателно скриени 20 пластични пакувања со кокаин, со вкупна бруто-тежина од 22,693 килограми“.
При понатамошна контрола, во товарниот простор на полуприколката биле пронајдени 163 пластични пакувања со необработен канабис со вкупна бруто-тежина од 133,669 килограми, како и уште 20 пластични пакувања со кокаин, со вкупна бруто-тежина од 21,942 килограми.
За дрогата бил уапсен возачот на камионот, како и уште едно лице, грчки државјанин кој требало да преземе дел од наведените наркотични супстанции.
Свет
Вонредна состојба и предупредувања поради бура за над 140 милиони луѓе во САД
Снежна бура предизвика сериозен хаос низ Соединетите Американски Држави, поради што за над 140 милиони луѓе, односно повеќе од 40 проценти од населението, е издадено предупредување за опасни временски услови. Поради невремето, речиси 12.000 летови планирани за викендот се откажани, јавуваат американските медиуми.
Предупредувањето се протега од Ново Мексико до Нова Англија, при што Националната метеоролошка служба најави обилни снежни врнежи и замрзнување на коловозите од источен Тексас до Северна Каролина. Во делови од југоисточна Оклахома, источен Тексас и Луизијана е регистрирано формирање мраз со дебелина до 0,6 сантиметри.
Метеоролозите предупредуваат дека по завршувањето на бурата ќе следи екстремно ниска температура, поради што снегот и мразот ќе се топат многу бавно, дополнително отежнувајќи ја нормализацијата на состојбата. Во некои региони штетите од мразот би можеле да бидат споредливи со оние предизвикани од урагани.
Гувернерите во повеќе од десет сојузни држави прогласија вонредна состојба или апелираа граѓаните да останат во своите домови. Во меѓувреме, околу 120.000 корисници останаа без електрична енергија, најмногу во Тексас, Луизијана и Ново Мексико.
US storm leaves 160,000 without power, forces thousands of flight cancellations
winter storm that has cut power to more than 160,000 electricity customers as far west as Texas, and threatened to paralyze eastern states with heavy snowfall pic.twitter.com/oaFPraSjbg
— Muhammad wahaj (@M_wahaj1) January 25, 2026
Авиосообраќајот е сериозно нарушен, при што сите летови беа откажани на некои аеродроми, вклучително и во Оклахома Сити, додека меѓу најпогодените се аеродромите во Далас, Нешвил и Шарлот.
Особено загрижувачки се температурите на Средниот Запад, каде се измерени и до минус 40 степени Целзиусови, што носи ризик од смрзнатини за само неколку минути. Во Висконсин е измерена температура од минус 38 степени, најниска во последните речиси три децении.
Американската администрација соопшти дека е во постојана координација со државните и локалните власти, а девет сојузни држави побараа прогласување вонредна состојба со цел активирање федерални ресурси за справување со последиците од екстремното невреме.

