Свет
Зеленски: Украинскиот Устав не допушта тргување со територии
Украинскиот претседател Володимир Зеленски денес во Брисел им упати низа клучни пораки на европските лидери, зборувајќи за трансатлантското единство, мировните напори, територијалните прашања, безбедносните гаранции и пристапувањето на Украина во Европската Унија.
„Клучно е Европа да остане обединета како што беше во 2022 година. Тоа силно единство е неопходно за да се постигне вистински мир“, рече Зеленски.
Тој нагласи дека убиствата мора да престанат: „Путин има многу барања, но не ги знаеме сите. Ако навистина има толку многу колку што слушнавме, ќе биде потребно време да се разгледаат сите. Тоа не може да се направи под закана со оружје.“
Тој повика на прекин на огнот и што е можно поскоро да се работи на конечен договор: „Ќе разговараме за ова во Вашингтон. Путин не сака да го запре убивањето. Но, тој мора да го стори тоа.“
Зеленски истакна дека вистинските преговори бараат вистински темели: „Ова значи дека можат да започнат таму каде што е сега линијата на фронтот. Контактната линија е најдобрата основа за разговори. Европејците го поддржуваат тоа и ние сме благодарни на сите.“
Зборувајќи за територијалното прашање, Зеленски беше јасен: „Уставот на Украина го оневозможува откажувањето од територија или нејзината размена за нешто друго. Ова е прашање за кое можат да разговараат само лидерите на Украина и Русија, во трилатерален формат – Украина, САД, Русија.“
Тој додаде дека засега нема индикации дека Русија се согласува со таков формат и дека во случај на одбивање, ќе мора да следат нови санкции.
Зборувајќи за безбедносните гаранции, Зеленски ја поздрави подготвеноста на Америка да соработува со Европа:
„Тоа е значајна промена. Но, засега нема детали за тоа како ќе изгледа – каква ќе биде улогата на Америка, што ќе може да направи ЕУ.“
„Ни требаат гаранции што ќе функционираат во пракса, како Член 5 од НАТО“, рече Зеленски.
Украинскиот претседател додаде дека го смета пристапувањето на Украина во ЕУ за дел од безбедносните гаранции: „Претседателот Трамп рече дека САД и Путин го гледаат тоа подеднакво. Затоа разговаравме за преговорите за пристапување во ЕУ.“
Зеленски нагласи дека не смее да има одвојување на Украина и Молдавија: „Тоа би бил многу лош потег. Доколку се случи таква поделба, тоа би значело дека Европа е поделена во однос на Украина и дека нема унифицирана и силна позиција за гаранциите. Многумина во Европа гледаат дека поделбата само ќе ја влоши ситуацијата.“
Зеленски зборуваше и за помагањето на децата: „Разговаравме за поддршка на украинските деца во училиштата. Нашата програма за училишен оброк им овозможува на децата од секое семејство во војна да добијат барем еден топол оброк. Учебната година е пред почеток и ја замолив Урсула да ни помогне да ја подобриме таа програма.“
Конечно, тој се осврна на санкциите против Русија: „Благодарен сум за 18-тиот пакет санкции. Мора да го подготвиме 19-тиот за Русија да разбере дека сме сериозни. Ни е јасно дека стратешката насока на Русија е антиевропска и затоа мора да продолжиме да го ограничуваме нејзиниот потенцијал.“
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Снегот го парализираше најголемиот аеродром во Германија, летовите откажани
Аеродромот во Франкфурт привремено ги суспендираше летовите повеќе од еден час денес по обилните врнежи од снег.
Операциите беа прекинати околу 15 часот по локално време, а во тој период немаше полетувања или слетувања поради насобран снег на пистите, објави операторот на аеродромот Фрапорт АГ.
Според податоците на Фрапорт, најмалку 67 од вкупно 922 закажани летови за тој ден беа откажани, додека десетина авиони беа пренасочени кон аеродромот во Штутгарт.
Пистите беа повторно отворени околу 16:15 часот, но Фрапорт предупреди дека сè уште може да се очекуваат застои во сообраќајот.
На патниците им беше советувано да ја проверат состојбата на своите летови кај авиокомпаниите.
Свет
Шефот на НАТО презентира три нивоа на гаранции за Украина
Генералниот секретар на НАТО, Марк Руте, верува дека фундаменталната цел на безбедносните гаранции, кои би стапиле на сила по прекинот на огнот, е значително да ја зголемат цената што Русија би ја платила за секој иден напад врз Украина. Руте го изјави ова на прес-конференција во Киев, пренесува Украинска правда.
Руте не сакаше детално да ги коментира написите на „Фајненшл тајмс“ за договорените принципи на гаранциите, иако потврди дека го прочитал извештајот. Сепак, тој појасни дека сегашните договори предвидуваат три нивоа на гаранции.
Првото ниво, рече тој, се состои од зајакната украинска армија, која би била финансирана од партнерите.
„Украинската војска очигледно ќе биде првата линија на одбрана доколку Русите или некој друг некогаш повторно ја нападнат Украина. Сите чувствуваме обврска да се осигураме дека украинските вооружени сили се во најдобра можна позиција да се заштитат себеси“, рече генералниот секретар.
Второто ниво, рече Руте, е „Коалицијата на подготвените“, составена од Франција и Обединетото Кралство. Тој не објасни како би функционирала во случај на напад, велејќи само дека целта на коалицијата не е само да се осигури дека украинската војска има сè што ѝ е потребно, туку и да гарантира други чекори.
Третото ниво се Соединетите Американски Држави. „А потоа Соединетите Американски Држави, почнувајќи од минатото лето, рекоа: Сакаме да се вклучиме“, додаде Руте.
Сите три нивоа заедно треба да обезбедат ниво на одвраќање доволно за да се обезбеди гаранција „дека Русија никогаш повеќе нема да се обиде да нападне“.
„Нема да коментирам за сè во медиумите, освен да кажам дека ова е генерално намерата – да се има безбедносна гаранција толку силна што би била многу лоша одлука Русија повторно да нападне“, заклучи тој.
фото/Depositphotos
Свет
(Видео) Рекордни врнежи од снег во Јапонија, 30 мртви, војската помага на терен
Триесет лица ги загубија животите во невообичаено обилните снежни врнежи во Јапонија, а некои области беа затрупани под снежна покривка висока до 4,5 метри. Властите ја ангажираа војската да помогне во расчистувањето на патиштата и да им помогне на постарите жители, пишува Euronews.
NOW : After Russia, record breaking snow covers Japan. Aomori city records the highest snow accumulation, almost 69 inches, in 40 years pic.twitter.com/7m2BCVrlzH
— Karthik Reddy (@bykarthikreddy) February 3, 2026
Службениците велат дека имало 30 смртни случаи поврзани со снежните бури во последните две недели. Во префектурата Аомори, снимките покажуваат куќа тешко оштетена под тежината на снегот, додека жителите се борат да се пробијат низ улиците покриени со длабоки наноси. Во некои оддалечени делови на Аомори, снегот сè уште достигнува 4,5 метри.
🇯🇵 Japan's Aomori Prefecture faced a record-breaking snow wave that left the region buried under nearly 4.5 meters (15 feet) of snow. This unprecedented climate event has led to tragic consequences, with 30 lives lost in just two weeks. pic.twitter.com/cIuA6Flxm9
— Roya News English (@RoyaNewsEnglish) February 3, 2026
Властите велат дека силната студена воздушна маса по должината на брегот на Јапонското Море донела многу повеќе снег од вообичаеното. Меѓу жртвите е и 91-годишна жена која била пронајдена под голема куп снег пред нејзината куќа. Се претпоставува дека била затрупана од снег што паднал од покривот.
Поради преоптовареност на локалните служби, владата ја испрати војската на терен за да помогне во расчистувањето на снегот и да им пружи помош на постарите лица кои живеат сами.
фото/Depositphotos

