Свет
Изнајмувач на Airbnb со вештачка интелигенција креирал штети во станот и барал 12.000 фунти отштета од станарката
Жена од Лондон добила извинување и поврат на средства од речиси 4.300 фунти од компанијата Airbnb, откако домаќин во Њујорк лажно ја обвинил дека предизвикала штета од над 12.000 фунти, пренесува Гардијан. Тој приложил фотографии како наводен доказ, кои, според жената, биле создадени со вештачка интелигенција.
Жената го резервирала еднособниот стан на Менхетен во Њујорк за два и пол месеци за да остане во него додека студира, но решила да замине порано бидејќи се чувствувала небезбедно во областа.
Кратко по нејзиното заминување, домаќинот поднел жалба до Airbnb, тврдејќи дека направила штета во вредност од над 12.000 фунти. Навел дека искршила масичка за кафе, душекот го извалкала со урина, оштетила робот правосмукалка, софа, микробранова печка, телевизор и клима-уред. Притоа, приложил и фотографии.
Airbnb ѝ соопштил дека, „по внимателен преглед на фотографиите“, треба да му плати 5.314 фунти на домаќинот. Таа поднела жалба и истакнала дека има очевидец, кој може да потврди дека станот бил оставен во уредна состојба. Дополнително, укажала на јасни визуелни несогласувања во фотографиите, што, според неа, укажувало на дигитална манипулација или употреба на вештачка интелигенција, пишува Гардијан.

„Такви несогласувања не се можни на автентични фотографии од ист објект. Тоа требаше да биде веднаш препознаено од Airbnb“, изјавила таа.
Пет дена по обраќањето на Гардијан до Airbnb, компанијата ја прифатила нејзината жалба. Прво ѝ понудиле 500 фунти, а потоа уште 854 фунти, што претставувало помалку од една петтина од вкупната цена на резервацијата. Откако жената одбила, на крајот ѝ била рефундирана целата сума од 4.269 фунти, а негативната оценка што домаќинот ја оставил на нејзиниот профил била отстранета.
„Загрижена сум за другите корисници кои можеби немаат ресурси да се одбранат од вакви измами. Денес е премногу лесно да се фалсификуваат фотографии со помош на вештачка интелигенција. Airbnb мора да има поостри критериуми за проверка“, изјавила таа за Гардијан.
Домаќинот што ја пријавил има статус на „супердомаќин“, што значи дека има искуство и високи оценки од претходни гости. Тој не одговорил на барањата од Гардијан за коментар.
Од Airbnb изјавиле дека не можеле да ја потврдат автентичноста на испратените фотографии и дека домаќинот добил предупредување за кршење на правилата. Доколку повторно добијат слична пријава, тој ќе биде отстранет од платформата.
„Сериозно ги сфаќаме пријавите за штета. Нашиот специјализиран тим ги разгледува сите достапни докази, а одлуките може да се обжалат“, изјавиле од компанијата за Гардијан.
Серпил Хол, директорка за економски криминал при консултантската фирма Baringa, објаснила дека денес е многу лесно да се манипулираат фотографии и видеа. Софтверите за оваа цел се евтини, достапни и лесни за користење.
„Многу компании веќе не ги прифаќаат фотографиите како единствен доказ во спорови“, рекла таа и додала дека „потребни се форензички алатки и системи за откривање измами, за да се потврди нивната веродостојност“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Зеленски очекува корисна следна рунда мировни преговори
Претседателот на Украина, Володимир Зеленски, денеска во Минхен изјави дека очекува следната рунда мировни преговори да биде сериозна, суштинска и корисна. Сепак, тој додаде дека понекогаш се чини како „страните да зборуваат за сосема различни работи“.
Нова рунда разговори меѓу претставниците на Русија и Украина, со посредство на САД, ќе се одржи во Женева во вторник и среда.
Зборувајќи на Минхенската безбедносна конференција, Зеленски рече дека клучниот фокус во мировните преговори е да се обезбеди дека „за четири години, цивилизираниот свет нема да биде принуден повторно да се оправдува, да ја префрла одговорноста и да бара некој друг да го обвини“ за уште една војна.
„Украина е подготвена за договор што ќе ни донесе вистински мир нам, на Украина и на Европа“, додаде тој и изјави дека Европа „практично не е присутна на преговарачката маса“, но треба да биде.
„Тоа е голема грешка“, рече тој.
Зеленски истакна дека би било илузија да се верува дека оваа војна сега може сигурно да се заврши со поделба на Украина. Тој повтори дека на Русија „не смее да ѝ се даде никаква надеж дека може да остане неказнета за ова злосторство“.
Тој вели дека Москва била најсериозна во врска со преговорите кога била погодена од длабоки украински напади на сопствената територија.
„Колку сме посилни, толку пореален станува мирот“, рече тој.
Свет
Грчките земјоделците го завршија протестот во Атина
Со сирени и свирење, исто како што и пристигнаа, тракторите на грчките земјоделци претпладнево си заминаа од Атина, откако во текот на ноќта останаа паркирани пред грчкиот Парламент. Околу 50 трактори вчера пристигнаа во Атина, поминаа низ низа централни улици, каде што беа пречекани и поздравени од граѓаните и случајните минувачи, а на ист начин си заминаа денеска.
Во текот на вечерта тракторите останаа паркирани на плоштадот Синтагма пред Парламентот, откако претходно, протестот заврши мирно, а свои обраќања имаа земјоделци од различни делови на земјата, пренесувајќи ги нивните ставови и барања поврзани со примарниот сектор.
Свет
(Видео) Хаос во авион, тепачка и расистички испади принудија итно слетување
Драматични сцени се одвивале во авион на авиокомпанијата „Jet2“, откако избувнала тепачка за време на летот од Анталија кон Манчестер. Поради инцидентот, авионот бил принуден итно да слета во Брисел.
Од компанијата соопштија дека летот „LS896“ бил пренасочен поради „апсолутно неприфатливо однесување на двајца патници“, кои подоцна биле симнати од авионот од страна на белгиската полиција. По интервенцијата, летот продолжил кон крајната дестинација и слетал во Манчестер околу 22 часот.
Според сведоштво на патник кој бил присутен во авионот, инцидентот започнал кога маж, кој наводно консумирал алкохол, почнал да извикува расистички навреди кон патници со пакистанско потекло.
– Иако пиеше алкохол, беше целосно свесен што зборува и што прави – изјавил сведокот, додавајќи дека ситуацијата дополнително ескалирала кога патникот не успеал да купи цигари за време на летот.
По тоа, тој станал агресивен и кон членовите на екипажот, а тензијата кулминирала со физичка пресметка во авионот.
Во еден момент ситуацијата стана многу физичка. Луѓето беа вознемирени и исплашени. Атмосферата беше хаотична – раскажал сведокот.
По принудното слетување во Брисел, двајцата патници биле приведени и симнати од летот. Од „Jet2“ потврдија дека тие се ставени на трајна „црна листа“ и повеќе нема да можат да летаат со оваа авиокомпанија.
– Како семејно ориентирана авиокомпанија имаме политика на нулта толеранција кон вакво однесување. Ќе ги преземеме сите правни чекори за да ги надоместиме трошоците што настанаа поради пренасочувањето на летот – соопшти портпаролот на компанијата.
Сведокот оценил дека инцидентот е потсетник дека „расизмот сè уште постои и нема место во општеството“.
‘FLIGHT’ CLUB: A Jet2 flight from Turkey to the U.K. was diverted to Belgium after a violent altercation broke out between passengers.
Jet2 says two passengers have been banned from flying with them, according to a report. pic.twitter.com/26FRuGhMOK
— Fox News (@FoxNews) February 14, 2026

