Повеќето држави во западниот дел на САД се соочуваат со топлотен бран и бележат високи температури трет ден по ред, што доведе до издавање на здравствени предупредувања и проблеми во електричната мрежа.

„Иако промената на времето донесе одредено олеснување во северните држави, вклучувајќи ги Монтана и Ајдахо, најлошото допрва следува за Калифорнија и југозападните делови на земјата“, рече метеорологот од американската национална метеоролошка служба, Ерик Шенинг, а пренесе агенцијата „Ројтерс“.

„Се наоѓаме во долготраен топлотен бран низ западниот дел на САД“, додаде тој.

Градот Солт Лејк Сити, во сојузната држава Јута, во вторникот регистрира температура од 42 Целзиусови степени, што е највисока температура од почетокот на водењето на евиденција во 1894 година.

Националната метеоролошка служба издаде предупредување за прекумерна топлина низ американскиот Запад, предупредувајќи дека ваквите услови можат да бидат опасни, дури и фатални.

Сепак, досега нема извештаи за смртни случаи како резултат на жештината.

„Обидете се да не поминувате премногу време надвор во најтоплиот дел од денот. Носете лесна облека, бидете хидрирани”, рече Шенинг, додавајќи дека жителите треба да внимаваат и на домашните миленици и да ги проверуваат постарите лица.

Издадено е предупредување за опасност од пожари во Аризона, Калифорнија, Невада и Јута.

Големи шумски пожари веќе ги зафатија Колорадо и Аризона.

Невообичаено силниот топлотен бран во доцната пролет е резултат на високиот притисок над југозападните пустини, велат метеоролозите.

Претседателите Владимир Путин и Џо Бајден се состанаа вчера за прв пат откако Бајден застана на чело на САД.

Средбата се одржа во Женева, а по неа се одржа прес-конференција на која, во еден момент, Путин стана видливо иритиран од новинарско прашање во однос на справувањето со неговите политички противници.

„Ако вашите политички противници се мртви, во затвор, отруени, дали тоа не испраќа порака дека не сакате политички противници, од што се плашите?“, праша новинарка од американската телевизија „Еј-би-си“.

Путин започна да се повикува на немирите во Капитол на 6 јануари и рече дека Русија не сака таков вид хаос на нејзина територија.

„Луѓето се побунија и влегоа во Конгресот со политички барања. Ним им се закануваат затворски казни од 20 до 25 години… Зошто? Сè уште не знам. Сочувствуваме со она што се случува во САД, но не сакаме истото да се случи во Русија“, одговори Путин.

Состанокот меѓу двајцата претседатели траеше околу три часа, немаше заеднички ручек, а и прес-конференциите беа одвоени.

Во Претставничкиот дом на американскиот Конгрес, републиканците и демократите со големо мнозинство гласаа за воведување нов федерален празник, 19 јуни.

Празникот е во спомен на ослободувањето на последните робови во Тексас во 1865 година.

Конгресот вчера го одобри предлог-законот за нов федерален државен празник со 415 гласа „за“ и само 14 „против“, додека ден претходно беше едногласно одобрен во Сенатот, а се очекува денеска да го потпише американскиот претседател Џо Бајден.

Џунтинт (на англиски јазик комбинација од јуни и бројот деветнаесет) претходно беше официјализиран во некои држави во САД вклучувајќи го и Тексас, кој официјално го прогласи за празник во 1980 година, но досега не беше државен празник.