Свет
Израел: Моќен ураган ќе ја погоди Газа, а покривите на терористичките облакодери ќе се тресат

Израел им порача на жителите на Газа веднаш да го напуштат градот откако предупреди дека ќе ги интензивира воздушните напади и копнените операции во Појасот Газа во „моќен ураган“ доколку Хамас не ги ослободи последните заложници што ги држи и не се предаде.
Во она што го нарече последно предупредување во понеделник, израелската војска ѝ порача на палестинската милитантна група дека Газа ќе биде уништена доколку не се разоружа и ослободи 48 заложници.
Жителите рекоа дека израелските сили ја бомбардирале Газа од воздух и разнеле стари оклопни возила на улиците. Хамас, во меѓувреме, го проучува најновиот предлог на САД за прекин на огнот, доставен во недела со предупредување од претседателот Доналд Трамп дека тоа е „последна шанса“ на Хамас.
„Им реков на жителите на Газа: Предупредени сте – тргнете се од таму!“ рече премиерот Бенјамин Нетанјаху, додавајќи дека Израел во последните денови срушил 50 „терористички облакодери“ како претходница на „копнена операција“ во Газа.
„Моќен ураган ќе го погоди небото над Газа денес, а покривите на облакодерите на теророт ќе се тресат“, рече израелскиот министер за надворешни работи Израел Кац.
„Ова е последно предупредување до убијците и силувачите на Хамас од Газа во луксузни хотели во странство: ослободете ги заложниците и положете го оружјето, или Газа ќе биде уништена, а вие ќе бидете збришани.“
Израелските одбранбени сили (ИДФ) бомбардираа 12-катна зграда во центарот на градот Газа, во која се сместени многу раселени семејства, три часа откако ги повикаа оние во облакодерите и оние во околните шатори да заминат.
Според високи израелски претставници, најновиот предлог на САД ќе бара од Хамас да ги врати преостанатите живи и мртви заложници на првиот ден од прекинот на огнот, за време на кој ќе се водат преговори за завршување на војната.
Хамас тврди дека ќе држи барем неколку заложници додека не завршат преговорите. Во соопштението за медиумите, тие наведоа дека се посветени на нивното ослободување, но со „јасна најава за крајот на војната“ и повлекување на израелските сили.
Висок функционер на Хамас, Басем Наим, во понеделникот изјави дека предлогот за примирје на САД се сведува на „прелиминарни“ идеи. „Јасно е дека примарната цел е да се постигне отфрлање на понудата, а не да се постигне договор што ќе доведе до крај на војната“, рече тој во објава на својот Телеграм канал, иако не го наведе официјалниот став на групата.
фото: принтскрин
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Катар го прифати извинувањето на Нетанјаху

Катар го поздрави извинувањето и ветувањето на израелскиот премиер Бенјамин Нетанјаху дека Израел нема повторно да изврши напад врз Доха, соопшти Белата куќа.
Нетанјаху претходно денеска од Белата куќа телефонски разговарал со катарскиот премиер Мохамед бин Абдурахман Ал Тани, извинувајќи се за нападот насочен кон раководството на Хамас, со кој била нарушена катарската сувереност.
Во заедничкото соопштение беше потврдено дека е воспоставен „трилатерален механизам“ за подобрување на односите. Катарскиот премиер ги поздравил гаранциите од Израел, нагласувајќи ја подготвеноста на Доха за понатамошна соработка во интерес на регионалната безбедност и стабилност.
Свет
„Ројтерс“: Нетанјаху му се извинил на Катар за нападот врз Доха

Израелскиот премиер, Бенјамин Нетанјаху, се извинил на Катар поради израелскиот воздушен напад врз Доха од почетокот на месецов, во кој цел биле функционери на Хамас, јави „Ројтерс“.
Според извор близок до израелскиот премиер, тој телефонирал со катарскиот премиер Мохамед бин Абдурахман Ал Тани од Белата куќа, каде што во исто време американскиот претседател Доналд Трамп остварил контакт со Катар.
Извинувањето доаѓа во момент кога Нетанјаху престојува во Вашингтон на средба со Трамп. Главна тема е новиот мировен план од 21 точка, со кој се предвидува прекин на огнот, ослободување на израелските заложници и воспоставување ново управување со Газа без учество на Хамас.
Катар претходно го осуди израелскиот напад како „подмолен“ и „груб прекршок на меѓународното право“. Во исто време, Нетанјаху е под силен притисок да го прифати американскиот план кој ја исклучува анексијата на Западниот Брег и бара формирање нова палестинска влада.
Свет
Осомничениот во случајот со Медлин Мек Кен: „Вратете ми го животот!“

Кристијан Брукнер, осомничен во истрагата за исчезнувањето на Медлин Мек Кен, за првпат јавно проговори по излегувањето од затвор. Во интервју за „Скај њуз“ рече дека е жртва на „лов на вештерки“ и побара да му се врати нормалниот живот.
„Не се чувствувам слободен. Носам нараквица и под 24-часовен надзор сум. Сакам ова да престане и некој да преземе одговорност,“ изјави Брукнер.
Тој се обиде да влезе во канцеларијата на германскиот обвинител Ханс Кристијан Волтерс, кој претходно јавно тврдеше дека има докази дека Брукнер ја киднапирал и убил Медлин, иако призна дека тие не се доволни за подигнување обвинение.
Брукнер (49) неодамна беше ослободен по издржана казна за друго кривично дело. Германските медиуми јавуваат дека по неговото ослободување бил сместен во привремено живеалиште, но по јавниот притисок и протестите на граѓаните, бил преместен од градот Нојминстер.
На директно прашање дали има врска со исчезнувањето на британското девојче, Брукнер одговори дека по совет на адвокатите нема да зборува на таа тема.
Тригодишното девојче исчезна од апартмански комплекс во Праја да Луз во Португалија на 3 мај 2007 година, што предизвика истрага низ цела Европа и стана еден од најпознатите случаи на исчезнати лица. Нејзините родители вечерале со пријателите во блискиот ресторан додека таа и нејзините помали браќа и сестри близнаци спиеле во станот. Нејзината мајка Кејт открила дека Медлин ја нема околу 22 часот по локално време.
Случајот останува нерешен, но германските обвинители велат дека имаат докази кои сугерираат дека Брикнер можеби бил во областа кога исчезнала Медлин. Волтерс рече дека иако тој и другите обвинители не веруваат дека имаат доволно докази за формално да го обвинат Брикнер во случајот Меккен, нивните напори ќе продолжат.