Руската вакцина за коронавирус „Спутник V“ на меѓународниот пазар ќе чини помалку од 20 долари по лице и ќе биде бесплатна за руските граѓани, објавено е на официјалниот профил на „Твитер“, посветен на рускиот лек.

Вакцината ќе се прима во два наврата, а секоја доза ќе чини помалку од 10 долари.

Објавувањето на цената доаѓа во време кога Русија се обидува да го забрза производството и дистрибуцијата на својот лек.

Кирил Дмитриев, шеф на рускиот фонд РДИФ, рече дека Москва и нејзините странски партнери може да произведат повеќе од милијарда дози вакцини следната година, што е доволно за 500 милиони луѓе.

Објавената цена е поевтина од вакцината на „Фајзер“ и „БиоЕнТек“, која чини 15,5 евра по доза, но поскапа од онаа на „АстраЗенека“, која ќе чини околу 2,5 евра по вакцинација.

Дмитриев за „Ројтерс“ изјави дека Москва имала за цел да ја намали цената за да ја направи вакцината достапна за што повеќе луѓе ширум светот.

Тој додаде дека новите клинички податоци, засновани на 39 потврдени случаи и 18.794 пациенти, покажуваат дека „Спутник V“, вакцина што треба да се прими двапати, била 91,4 проценти ефективна на 28 дена и 95 проценти на 42 дена.

Руското Министерство за здравство ја регистрираше вакцината на почетокот на август, а руските медиуми објавија дека добиле апликации за набавка од повеќе од 20 земји.

Производството е договорено во пет земји.

Некои западни научници ја критикуваа Москва за наводно намалување на некои стандарди при тестирањето, со цел вакцината да биде готова што побрзо. Русија го отфрли ова и ги обвинува западните земји за валкана кампања за одвраќање на луѓето во, како што ја нарекуваат, новонастанатата борба на пазарот за лекови.

Властите на Велика Британија размислуваат да ги повлечат своите судии од Врховниот суд во Хонгконг бидејќи Кина продолжува да ги крши своите меѓународни обврски на таа територија, изјави шефот на британската дипломатија, Доминик Раб.

Велика Британија, која владееше со Хонгконг повеќе од 150 години сè додека градот не се врати во надлежност на Кина во 1997 година, предупредува дека новиот закон за безбедност, што официјален Пекинг му го наметна на Хонгконг на 30 јуни, ја крши заедничката кинеско-британска декларација, која го трасира патот за враќање на Хонгконг на Кина, објави „Ројтерс“.

Официјален Лондон се спротивстави и на воведувањето нови правила наметнати од Пекинг, со кои се дисквалификуваат избраните законодавци на Хонгконг и се врши одмазда на извршната власт над политичката опозиција и неистомислениците.

„Овој период од историјата на Хонгконг, по враќањето на таа територија во Кина, е извор на најголемата загриженост“, напишал Раб во предговорот на најновиот редовен шестмесечен извештај за Хонконг.

Раб најави дека ќе разговара со лордот Рид, претседателот на Врховниот суд на Велика Британија, дали е соодветно британските судии да останат на позициите привремени судии на Врховниот апелациски суд во Хонгконг.

Папата Франциско нема разбирање за демонстрантите што се против ограничувачките мерки, особено против носењето маски.

За луѓето што протестираа по насилната смрт на афроамериканецот Џорџ Флојд, вели дека изразиле здрав гнев против расизмот.

„Некои групи протестираа, одбија да се држат дистанца, маршираа против забраната за патување – како мерките наметнати од владите да се еден вид политички напад врз личната слобода“, напиша папата во новата книга, пренесува „Гардијан“.

Тој го поддржа носењето маски како вид заштита од коронавирусот.

„Истите тие луѓе што протестираа против ограничувачките мерки никогаш не би протестирале против смртта на Џорџ Флојд ниту, пак, би демонстрирале затоа што некаде во светот на децата им недостига вода за пиење, образование или поради семејствата што ги изгубиле сите приходи поради пандемијата. Не, тоа не ги допира, тие не би протестирале затоа што не се во можност да излезат од својот мал свет на лични интереси“, додаде Франциско.