Европа
Италија ќе гради прифатни центри за мигранти во Албанија
Италија ќе изгради центри во Албанија за да ги прими илегалните мигранти што пристигнуваат во Италија по море, изјави во понеделникот премиерката Џорџија Мелони при претставувањето на новиот план за намалување на бројот на мигранти во Италија, кој е речиси двојно зголемен во изминатата година.
Мелони рече дека албанските центри првично ќе бидат домаќини на речиси 3.000 луѓе кога ќе бидат отворени пролетта 2024 година.
Таа додаде дека италијанската влада се надева дека ќе го зголеми нивниот капацитет за обработка на барањата на 36.000 мигранти годишно во тоа време.
Повеќе од 145 илјади мигранти пристигнале во Италија по морски пат во 2023 година, што е голем пораст во однос на 88 илјади во истиот период лани.
Владата на премиерот Мелони веќе ги заостри затворските казни за шверцерите на луѓе и одлучи да го зголеми бројот на прифатни центри во целата земја за мигранти пред нивната можна репатријација.
Десничарската партија на Мелони долго време бара такви објекти да се формираат надвор од Европската Унија предлагајќи, на пример, Северна Африка, но ниту една земја од тој регион не се согласила на тоа.
„Сметам дека ова е навистина европски договор и сакам да кажам дека покажува како е можно да се работи заедно за управување со миграциските текови“, рече Мелони во Рим покрај нејзиниот албански колега Еди Рама.
„Тие (мигрантите) ќе останат во овие центри онолку долго колку што е потребно за брза обработка на барањата за азил и доколку е потребно, за репатријација“, додаде таа. Мелони рече дека малолетниците, бремените жени и другите ранливи групи нема да бидат сместени во Албанија.
Извор од канцеларијата на Мелони рече дека пактот ќе важи само за мигрантите спасени на море од италијанската крајбрежна стража или морнарица, а не хуманитарни организации.
Истиот извор негира дека Италија ќе ѝ плати на Албанија за прифатните центри.
Мелони рече дека Италија ќе изгради објект за идентификација на мигрантите во албанското пристаниште Шенгин и центар за репатријација во внатрешноста.
Двата објекта ќе работат под италијанска јурисдикција, посочи таа.
Зборувајќи на италијански, албанскиот премиер Рама рече дека чувствува должност да му помогне на Рим поради посебните односи меѓу двете земји.
„Подавањето рака во овој случај значи да се помогне во управувањето со ситуацијата што сите ја гледаат како тешка за Италија“, рече Рама.
Најмногу мигранти во 2023 година пристигнале во Италија од Гвинеја, Брегот на Слоновата Коска и Тунис.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Украинска политичарка застрелана во глава: „Ситуацијата е сериозна“
Непознат сторител пукал во Ирина Фарион, поранешна украинска пратеничка од крајната десница, соопштија украинските власти. Фарион (60) е хоспитализирана со прострелна рана во главата, соопшти украинската национална полиција. Нејзината состојба е „исклучително сериозна“, додаваат тие.
Полицајците се обидуваат да го идентификуваат напаѓачот, пишува Киев Индепендент. Претседателот Володимир Зеленски беше информиран за ситуацијата од страна на министерот за внатрешни работи и шефот на Службата за безбедност на Украина (СБУ).
„Секое насилство е за осуда и кој и да е одговорен мора да ги сноси последиците“, рече Зеленски.
Ирина Фарион, која е позната по нејзините контроверзни изјави за употребата на рускиот јазик во Украина, се приклучи на ултранационалистичката партија Свобода во 2005 година и беше пратеник во парламентот меѓу 2012 и 2014 година.
Во јуни 2024 година, таа беше вратена како професорка на Катедрата за украински јазик на Политехничкиот универзитет во Лавов, набргу откако беше отпуштена. Фарион предизвика бес кога на 6 ноември рече дека не може да ги нарекува украинските војници украински ако зборуваат руски.
Скандалот околу нејзините изјави ескалира откако таа наводно добила порака за поддршка од Максим Хлебов, проукраински студент кој живее на окупираниот Крим. Таа го објави мејлот на своите социјални мрежи, по што наиде на остри критики.
Службата за безбедност на Украина (СБУ) во ноември 2023 година соопшти дека Фарион е под кривична истрага и за нејзините изјави за војниците кои зборуваат руски и за протекувањето на пораката на Хлебов.
Европа
Русите нудат парична награда за првиот уништен Ф-16
Руски фирми нудат парични награди за уништување на F-16 Fighting Falcons, охрабрувајќи ја својата војска да ги уништи западните авиони кои наскоро ќе се појават над небото на Украина.
Ова првпат беше објавено на каналот Телеграм на руското Министерство за одбрана на почетокот на оваа недела.
„Ќе има награда за уништување на борбените авиони Ф-15 и Ф-16. Наградата за првиот ќе биде 15 милиони рубли“, се вели во објавата, цитирајќи го директорот на руската нафтена компанија ФОРЕС Илја Потанин.
Инаку, 15 милиони рубљи се еднакви на околу 170.000 долари или околу 155.500 евра.
Министерството за одбрана соопшти дека се понудени и парични награди од 500.000 рубљи за уништување на тенковите на НАТО во Авдиивка, пренесува „Њузвик“.
На приложеното видео во објавата на Телеграм, може да се видат руски војници како добиваат награди и се ракуваат со нивните претпоставени офицери.
Европа
Зеленски ја моли новата британска влада: „Дозволете ни да ја нападнеме Русија со моќни ракети“
Украинскиот претседател Володимир Зеленски денеска им се обрати на министрите на новата британска влада, на покана на премиерот Кир Стармер, и го повтори апелот до западните сојузници да дозволат напади врз Русија со ракети со долг дострел.
Зеленски е првиот странски лидер кој лично се обратил пред британскиот кабинет откако поранешниот американски претседател Бил Клинтон го стори тоа во 1997 година.
Украинскиот претседател рече и дека Британија треба да ги убеди своите партнери, кои зазедоа различни позиции за тоа како Украина може да го користи оружјето што им е доставено, да ги укинат ограничувањата за употреба на оружје и муниција.
„Во моментов го немаме главниот одговор на тоа прашање, што се однесува на нашите долгорочни можности. Ве молиме, убедете ги другите партнери да ги укинат овие ограничувања“, рече Зеленски.
Стармер му рекол на Зеленски дека Британија ќе ја забрза испораката на клучната помош за Украина, откако неговиот министер за одбрана на почетокот на овој месец потврди дека помошта ветена од претходната конзервативна влада ќе биде доставена за 100 дена.