Се проценува дека кинеските патници откажале стотици илјади авионски билети за Јапонија, бидејќи продолжува дипломатскиот спор околу ставот на Јапонија кон Тајван.

Под притисок од бизнис групите, Јапонија испрати висок дипломат во Пекинг во обид да ги смири тензиите, откако јапонската премиерка, Санае Такаичи, изјави дека нејзината земја би можела воено да се вклучи доколку Кина се обиде да го нападне Тајван.

Нејзините забелешки ја разбеснија кинеската влада, која издаде предупредувања до кинеските патници и студенти да избегнуваат да одат во Јапонија. Најмалку седум кинески авиокомпании, вклучувајќи три државни авиокомпании, објавија дека ќе понудат бесплатни откажувања на патниците со билети за Јапонија.

Аналитичарот за воздушен сообраќај Ханминг Ли рече дека податоците за заминувања сугерираат дека околу 500.000 авионски билети за Јапонија се откажани помеѓу 15 и 17 ноември.

Кинескиот портал Џиму њуз објави дека „Сичуан ерлајнс“ ги откажала сите летови помеѓу Ченгду и Сапоро од јануари до крајот на март. Нискобуџетниот превозник „Спринг ерлајнс“ исто така откажа голем број летови до Јапонија.

Кина е втор најголем извор на туристи за Јапонија, а кинеските студенти го сочинуваат мнозинството меѓународни студенти во Јапонија. Акциите на јапонските малопродажни и туристички компании паднаа во понеделник откако беа воведени мерките.

Ли изјави за „Гардијан“ дека ова е најголемото масовно суспендирање на летови што го видел од почетокот на пандемијата на Ковид. Сепак, тој верува дека ова нема да има прекумерно влијание врз домашната индустрија на Кина. „Не е голема загуба за авиокомпаниите, бидејќи пазарот на летови Кина-Јапонија е мал во споредба со целиот домашен и меѓународен пазар“, тврди тој.

Откажувањата на патувањата се дел од растечкиот список на економски контрамерки, по реакциите кои до недела беа претежно реторички.

Дистрибутерите на филмови го одложија објавувањето на најмалку два јапонски филма во Кина, а државните медиуми објавија дека продажбата на билети за веќе објавениот јапонски филм „Убиец на демони: Замок на бесконечноста“ опаднала во последните денови. Државниот радиодифузер CCTV соопшти дека падот на гледаноста се должи на „силното незадоволство кај кинеската публика“ од забелешките на јапонската премиерка.

Фото: ЕПА

Папата Лав ја повтори својата критика кон тврдокорната антиимиграциска политика на американскиот претседател Доналд Трамп, велејќи дека администрацијата се однесува кон странците што живеат во Соединетите Држави на начин што е „крајно непочитувачки“.

Зборувајќи со новинарите во Кастел Гандолфо, неговата резиденција надвор од Рим, папата ги повика луѓето во Соединетите Држави „да бараат начини да се однесуваат кон луѓето хумано, да се однесуваат кон луѓето со достоинството што го имаат“.

Лав, првиот американски папа, го изрази своето неодобрување кон таргетирањето на имигрантите од страна на администрацијата на Трамп со сè поостри термини во последните недели.

Во септември, тој го нарече нивниот третман „нехуман“, предизвикувајќи жестоки реакции од некои истакнати конзервативни католици.

Репортерот го праша Лав за изјавата на Конференцијата на католички бискупи на САД од 13 ноември, во која се критикуваат политиките на администрацијата на Трамп и се повикува на „значајна реформа на имиграцијата“.

„Тоа е многу важна изјава“, рече папата. „Би ги повикал сите луѓе во Соединетите Држави да ги послушаат“.

Тој рече дека поединечните земји имаат право да ги чуваат своите граници, но дека многу имигранти во САД „живеат добар живот“ и се третираат „на начин што е, благо речено, крајно непочитувачки“.

фото: принтскрин

Усвојувањето на закон со кој му се наложува на Министерството за правда на САД да ги објави сите документи за осудениот сексуален престапник Џефри Епштајн е редок момент на двопартиска соработка на Капитол Хил.

Законот беше усвоен со 427 гласови „за“ и 1 „против“. Единствениот глас „против“ беше на републиканскиот претставник од Луизијана, Клеј Хигинс. За Хигинс, клучното прашање е заштитата на личните податоци на многуте жртви на Епштајн.

„Од самиот почеток бев против овој закон, од принципиелна гледна точка. Она што беше погрешно во законот пред три месеци, е погрешно и денес. Тоа е напуштање на 250 години кривична правда во Америка. Како што е напишан, овој закон разоткрива и повредува илјадници невини луѓе – сведоци, луѓе кои дале алиби, членови на семејството итн.

Овој вид широко откривање на досиеја од кривична истрага, објавени во бесни медиуми, апсолутно ќе им наштети на невини луѓе. Не со мојот глас. Надзорниот комитет спроведува темелна истрага која веќе објави над 60.000 страници документи од случајот Епштајн.

Тој напор ќе продолжи на начин што ќе им обезбеди секаква соодветна заштита на невините Американци. Доколку Сенатот го измени законот за правилно да се справи со приватноста на жртвите и другите Американци кои се именувани, но не се кривично вмешани, тогаш ќе гласам за овој закон кога ќе се врати во Претставничкиот дом“, напиша Хигинс на Икс откако законот беше усвоен во Претставничкиот дом.

Но, само неколку часа подоцна, Сенатот едногласно го усвои законот, оставајќи го Хигинс како единствен член на Конгресот кој гласаше против законот. Хигинс го претставува третиот округ на Луизијана во Претставничкиот дом од 2017 година, а на неговата официјална веб-страница пишува дека тој е нашироко познат како еден од најконзервативните членови на Конгресот.

фото: принтскрин