Свет
Киев за предлогот на Путин: Зеленски нема да оди во Москва

Предлогот на рускиот претседател Владимир Путин за средба со украинскиот претседател Володимир Зеленски во Москва е неприфатлив, соопшти денес украинската влада.
Министерот за надворешни работи на Украина, Андриј Сибиха, изјави дека најмалку седум земји, вклучувајќи ги Австрија, Ватикан, Швајцарија и три земји од Заливот, се подготвени да бидат домаќини на средба меѓу Зеленски и Путин, пренесува Ројтерс.
„Ова се сериозни предлози и претседателот Зеленски е подготвен за таква средба во секое време. Сепак, Путин продолжува да ги лаже сите нудејќи очигледно неприфатливи предлози“, објави Сибиха на својот профил на мрежата Икс.
Порано денес, Путин изјави дека не ја исклучува можноста за средба со Зеленски и предложи средбата да се одржи во Москва. „Ако Зеленски е подготвен за средба, нека дојде во Москва“, рече Путин, додавајќи дека „има светлина на крајот од тунелот“, пренесува РИА Новости.
Тој истакна дека ако преовлада здравиот разум, тогаш може да се постигне договор за тоа како да се заврши војната во Украина на задоволителен начин.
„Во спротивен случај, ќе мора да решиме сè со воени средства“, рече Путин и додаде дека го информирал американскиот претседател Доналд Трамп дека сака да се сретне со Зеленски.
Тој изјави дека е можно да се постигне прифатлива опција за завршување на војната, додавајќи дека сите обиди на Русија мирно да го реши украинското прашање се осуетени.
Тој истакна дека ја гледа искрената желба на администрацијата на Трамп да го реши украинскиот конфликт и го нарече Зеленски „вршител на должноста шеф на администрацијата на Украина“, пренесува Танјуг.
Фото: принтскрин
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Папата Лав Четиринаесетти го прогласи 15-годишниот компјутерски гениј за прв светец на Католичката црква

Папата Лав Четиринаесетти го прогласи 15-годишниот компјутерски гениј за прв светец на Католичката црква од т.н. Милениум генерација давајќи ѝ на следната генерација католици пример за некој што користи технологија за ширење на верата.
Папата го канонизираше Карло Акутис, кој почина во 2006 година, за време на миса на плоштадот „Свети Петар“ на која присуствуваа десетици илјади луѓе, многу од нив од таа генерација и парови со мали деца. На првата миса за канонизација на светци од почетокот на неговото папство, Лав канонизираше и друг Италијанец кој почина млад, свештеникот Џорџо Фрасати.
Ватиканот соопшти дека 36 кардинали, 270 епископи и стотици свештеници се пријавиле да присуствуваат на мисата со папата Лав во почит и кон епархијата и кон обичните верници.
Двете церемонии беа закажани за почетокот на оваа година, но беа одложени поради смртта на папата Франциско во април. Франциско се залагаше за канонизација на Акутис, убеден дека на црквата ѝ се потребни такви луѓе за да привлече млади католици, а истовремено да покаже дека обрнува внимание на ветувањата и опасностите од дигиталното доба.
Акутис беше роден на 3 мај 1991 година во Лондон, во богато, но не строго католичко семејство. Семејството се преселило во Милано кратко време по неговото раѓање, а неговото детство било обележано со сè посилна религиозна посветеност.
Момчето покажало особен интерес за компјутерските науки и го добило прекарот „инфлуенсер на Бога“ благодарение на најголемото технолошко наследство што го оставил зад себе – повеќејазична веб-страница што ги документирала таканаречените евхаристиски чуда признати од црквата – проект што го имплементирал во време кога развојот на ваквите страници го правеле професионалци.
Во октомври 2006 година, на 15-годишна возраст, Акутис се разболел и му била дијагностицирана акутна леукемија. Починал во рок од неколку дена.
Постапката за канонизација на Акутис била брза, бидејќи епархијата видела дека тој станува исклучително популарен меѓу младите католици, кои го гледале како современ модел.
Фрасати, другиот светец канонизиран денес, е роден во 1901 година и починал во 1925 година.
Свет
Се урна покрив на супермаркет во Германија, двајца се тешко повредени

Две лица се тешко повредени, а уште двајца се со полесни повреди при делумно уривање на покрив на супермаркет во Лаухринген, Југозападна Германија, во близина на границата со Швајцарија, соопшти полицијата, пренесува ДПА.
Инцидентот се случил вчера околу 17:45 часот по локално време во делот на супермаркетот каде се наоѓала контролната сала, во квартот Валдшут.
Причините за уривањето се уште се истражуваат, а не е познато колку купувачи биле во продавницата во моментот на несреќата.
Свет
Руските сили извршија нов масовен напад врз повеќе региони во Украина, меѓу загинатите е и бебе

Руските сили ноќеска извршија нов масовен напад врз повеќе региони во Украина, меѓу кои и главниот град Киев, каде е погодена главната зграда на украинската влада. Во нападот, како што соопштија утрово украинските власти, убиени се три лица, меѓу кои и едно бебе.
Според извештатите, Киев бил цел на напади со беспилотни летала и ракети истрелани од Русија, а покрај убиените, во нападот се повредени и 18 лица, а десетици згради биле опожарени.
Ова е првпат зграда на украинската влада да биде оштетена во руски напад од почетокот на војната.